S tallelt n Usɣur azayez n tdawsa n Udekkar i d-thegga tddukkla tadelsant Itri n Yiburayen taẓrigt tis snat n tfaska n yimeqqranen, neɣ n yiwessura n taddart, i yeflen akkin i 100 n yiseggasen di tmeddurt-nsen. Deg sin n wussan n usihar, ayendin d armud i d-yettwaheggan i lfayda n yimezdaɣ n temnaḍt-nni d tid i as-d-yezzin. Imi ass n amhad, ahil yerza tilawin abeɛda, i yettwaɛerḍen ɣer uɛayer ɣef uxenẓir n tebbuct. Ulamma yella ukukru sɣur tlawin seg waṭṭan-a i d-yeḍḥan gar yiɛdawen-nsent imezwura, wanag ddeqs seg-sent i iɛawlen ad gent tigawt-a n useḥbiber d uḥezzeb. Syin akkin, mettwal 16:00 n tmeddit, tella-d temlilit n ddabex n uḍar gar yimuraren iqburen n tɣiwant n Tifra. Ma yella azekka-nni sem, seg 09:00 d tasawent, ttwasersent-d temsikniyin i icudden ɣer udlis akked tinḍi. Armi d 10:00, yella-d usqerdec n wawal ɣef temḍerrit n ddexxan d kra n waṭṭanen, send ad d-yettsuddes usihar-nniḍen i yimuḍan, maca tikkelt-a i uɛayer ɣef waṭṭan n ssker d waddad n yidammen. Ɣef 13:00 n tmeddit, temmug tejmilt i yiwessura n taddart i iḥeḍren ɣef usayes, s tikci n tfelwiyin n yiseɣ. Ad d-nesmekti d akken awessar n tɣiwant n Tifra akka tura yesɛa deg yixef-is tasut (lqern) d sin n yiseggasen. Ɣer taggara, send ad d-taweḍ temdelt n tfaska-a deg teẓrigt-is tis snat, iga ucennay Lwaliya Busaɛad tameɣra n ccna akken yella deg wahil. « Tɛedda deg tegnatin yelhan tejmilt-a i yimɣaren-nneɣ imeqqranen », i aɣ-d-yenna uselway n tddukkla Itri n Yiburayen, Mass Murad Tuwwak. Send ad d-yernu: « Mi d-snulfaɣ tafaska-a, lliɣ d aɛeggal deg Useqqamu aɣiwan n Tifra. Seg yimir-nni, azal n kraḍ n yiseggasen tura, ur d-yelli usuddes n teẓrigt tis snat. Ɣef waya i nemsefham di tddukkla, ad nuɣal ad tt-id-nheggi, ɣas nɛeṭṭel ».
M. K.