Deg ubrid n tudert, akken yebɣu yili umdan, yettaf-d anda ara yesres iḍarren ed ɣer wanda tansa ara yerr. Amedyaz Ḥmed Ɛezzun, yezmer ad yili d amedya n waṭas n wid i teǧǧa tafat deg wallen. Ɣas seg temẓi i d-yemlal ed waṭṭan i as-yekksen iẓri, yeḍfer s tafat n wul abrid-is deg ddunit almi yuɣal yennum addad-is, ileḥḥu weḥd-s deg taddart-is. Nnig n waya, Ḥmed degmi yemlal ed tmedyezt mm yiḥulfan, yettekka deg waṭas n tfaskiwin i d-yettilin deg Tmurt n Yizwawen; am Bgayet, Aqbu, Tizi Wezzu, Tubiret, ed ideg yewwi kra n warrazen deg umecwar-is ar tura. Mi i as-d-tura tegnit ad yeg asileɣ ɣef umaḍal n tilifun urkid s tallelt n Tdukkla n Wid ur Nferrez n Bgayet, ukud yemyussan aṭas-aya tura, ifures Ḥmed Ɛezzun tagnit-a, imi iga asileɣ-is yerna yeffeɣ-d ɣer taggara s ugerdas i as-yeldin tiwwura n uqeddic deg tɣiwant n Ayt Smaɛel, ddaw leɛnaya n Tmehla n Tigawt Tinmettit (DAS) n Bgayet. Deg tillin-is akked tdukkla-ya, yenwa daɣen ad yesɛu abiru seg Yiderginen almi d Tsexriwt ed Ayt Smaɛel, ideg ara iqeddec i ubaɣur n yiderɣalen n temnaḍt, wanag ur yufi anda ara as-d-isiḥ. Almi d-yeḥḍer wass ad d-tennulfu Tdukkli i Yimeɛḍar ed Yimuḍan Idumen «Tiɣri», yeqqel-d deg-s i Ḥmed umḍiq n uselway wis sin, neɣ n unmazul n uselway, i yeṭṭef s tumert akken i aɣ-d-yenna: «mi yi-d-yemmeslay Ɛebdun Smaɛil ɣef tekti n usnulfu n tdukkla-ya, cerheɣ ayendin nniɣ-as nekk aql-i heggiɣ, imi d ayen igerrzen aṭas. Dɣa, mi nɛedda ɣer tigawt, ɣer umsegraw ilmend n usnulfu-ines unsib, rniɣ ferḥeɣ mi qeblen merra isem i as-fkiɣ “Tiɣri“.» Yufa ihi Ḥmed Ɛezzun amkan i yeddem s tumert, imi ɣas akken iga s waddad-is, anda texdem armud (activités) tdukkla-ya tiɣri atan din, am tikkelt iɛeddan mi rzan ɣur yimuḍan n Txerraḍt (Xerraṭa). Ma yella d asemmed n wahil i useggas-a, aṭas i yettraǧun Ḥmed d yimdukkal-is, imi ma drus llant kraḍ n tigawin (actions) ara yemmaggen send ad d-yelḥeq 2016.
Mhenni Xalifi