Iwakken ur ntettu ara 127-nni n yimeɣrasen yeɣlin deg tefsut-nni berriken i iruḥen wwin yid-sen tayri, glan s usirem. Ɣef tmaziɣt ay ɣlin, akken yiwen wass ad d-teffeɣ seg lebḥer n tatut. Tamaziɣt ass-a, tḥella-d kra seg yizerfan n tarwa-s, maca mačči akken i ten-bɣan wid-nni akken iqublen lmut. Tuɣal d tutlayt taɣelnawt, tenna tarwa-s drus, imi aẓar n Lezzayer d tefriqt ugafa d amaziɣ.
Tettwaselmed di lakul akken i tt-ssarmen yimeɣnasen n 80, gar-asen Dda Lmulud, maca mačči s lekmal, acku yewwi-d ad tettwasɣar deg yakk tamurt. Tuɣal d tunṣibt, a rrbeḥ a tafat, maca nnan drus daɣen, imi tamaziɣt ur telli d takna n tiyaḍ. Arrac-nni yeɣlin, idammen-nsen ur ruḥen ara di lbaṭel. Yeɣli Masinisa deg 18 yebrir, tecɛel tefsut. Ass n 25 yebrir, ḍrant tmesbaniyin meqqren yeglan s wacḥal d rruḥ. Ass n 27, yeɣli Kamal Irchen deg Yiɛeẓẓugen, uqbel ad t-yeffeɣ rruḥ, yura TILELLI s yidammen-is. Ɣlint ula d tulawin, deg wass n 28 deg Micli, tettwanɣa Nadya At Wesliman yellan d taselmadt n uɣerbaz.
Ɣlin ula d imecṭaḥ, deg wayyur n mayyu, yemmut Msalti Ḥafiḍ deg Tqeryet, d aqcic ur newwiḍ ara 14 d aseggas. Akken i tkemmel twaɣit, ḍefren wiyaḍ, mmuten, ggujlen yimecṭaḥ, ttwajerḥen, runt tyemmatin. Ma d wid i ten-yenɣan, urǧin ttwaḥasben. Wissen ma ad yili ṭṭmeɛ deg tafat d teɣdemt yeṣfan d uɣerbaz ireṣṣan deg wayen merra iḍerrun taggara-a deg tmurt. Ma d wid yellan d ssebba n lmeḥna yiwen ur ten-id-yettader ! Ɣef waya ur ilaq ara ad ttwattun wid yemmuten, tajmilt-nsen d tameqqrant. Kkin deg cwiṭ-agi i d-iṣaḥen tamaziɣt s yidammen-nsen yuzzlen. Iman-nsen di talwit.
Kh. A.