Ɣef leḥsab n yisallen i d-fkan yimḍebbren n Srabes n Tfellaḥt n Tizi Uzzu, ugar n 32 594 n yisekla i tečča tmes deg unebdu-agi iɛeddan deg lwilaya n Tizi Uzzu. Deg yiwet n teftart i d-thegga Tenmehla n Srabes n Tfellaḥt n Tizi Uzzu i lmed n unejmuɛ amagnu n Useqqammu Aɣerfan n Ugezdu n Tizi-Uzzu, deg ddurt iɛeddan, tefka-d Tenmehla isallen yeɛnan ayen s wacu i d-tegla tmes. Dɣa deg tazwara, ad naf tečča tmes azal n 32 594 n yisekla i iḥuzan tajumma n 251 n yihiktaren n yiɛerqab d tẓegwa. D tizemrin i yerɣan aṭas, dima ɣef eḥsab n yisallen i d-yefka unemhal n Srabes n Tfellaḥt, Mass Laib Makhlouf, s wazal n 19 606 n tzemrin yerɣan deg unebdu iɛeddan.
D ayen ara d-yefkan 78% seg yiseklan tečča tmes, d ayen i ḥuzan, diɣ, azal n 196 n yihiktaren n tajumma n iɛerqab n uzemmur yerɣan. Ad naf daɣen deg umḍiq wiss sin, tineqqlin i tečča tmes, s wazal n 2 428 n tneqqlin, deg tajumma n 12,14 n yihiktaren n wurtiyen. Ula d aḥric n tfellaḥt n temẓin d yirden, ur ten-tezgil ara twaɣit-agi n tmes, i iḥuzan azal n 55 n yihiktaren : 21 n yihiktaren deg tɣiwant n Souamaa, d 34 deg Ugni Yefren, rnu ɣef waya tella-d tmerɣiwt n 3 824 lbuṭat n walim. Daɣen rɣan rebɛa (04) n tẓeɣwa n ttrebga n yiyuẓaḍ, d lmut n 3 500 n yiyuẓaḍ n uksum, d tmerɣiwt n waṭas n ttawilat n ttrebga n yiyuẓaḍ, deg tɣiwant n Makuda. Ur tezgil ara tmes ula d aḥric n ttrebga n tzizwa, imi yerɣa wazal n 458 n teɣrasin n tzizwa yeččuren, d 132 n teɣrasin tilmawin, dima ɣef leḥsab n yisallen n Srabes n Tfellaḥt. Ajared n lexṣara s wacu i d-tegla tmes, mazal yettkemmil deg merra tiɣiwanin n ugezdu n Tizi Uzzu.
A. Z.