Mazal teṭṭef tesɣunt Aselmad deg leɛwayed-is, s tuffɣa n teẓrigt tis seddiset (6) ass n, 12 cutember 2019, i yimeɣriyen, akken deg-s ad afen ayen ḥwaǧen. Ɣas tɛeṭṭel cwiṭ tikkelt-a, imi qrib 9 n wagguren segmi d-teffeɣ tesɣunt tis semmuset (yennayer 2019), maca s lebɣi, swejden-tt-id sin n yimsuddsen i as-yellan i lmendad. Tasɣunt n tikkelt-a, ur temgared ara s waṭas ɣef tid iɛeddan. Tebda d isental n yiḍrisen i d-ssumren wid yuran, ama d iḍrisen n tilawt neɣ n usugen. Ad naf wid n wannaw ullis, agelman, imsegzi d yimesfukel. Iḍrisen i d-yernan d imaynuten tikkelt-a, d wid n tantaliwin timaziɣin-nniḍen am tcawit, tamẓabit d tmacaɣt s yisekkilen n tifinaɣ.
Akken daɣen ara naf aḥric n tmedyazt, wayeḍ n wurar s usekkil neɣ s wawal ideg zemren ad d-sfaydin yinelmaden n yiswiren imenza. Aḥric aneggaru n tesɣunt, ad t-naf d amaynut, d isental n yikayaden s tegzi n uḍris, iferdisen n tutlayt d usenfali s tira, acu kan iḍrisen i yettwasmersen deg yisental-a, d wid n semmuset n tesɣunin yezrin. Taẓrigt-a tis seḍḍiset, ad tt-naf ɣezzifet kra, imi deg-s 90 n yisebtar, ma d wid yuran deg-s, llan yiselmaden n tmaziɣt, llan wid ur nelli d iselmaden, maca tezdeɣ-iten leḥmala n tira s tutlayt-nsen. Am tannumi, yal tikkelt anwa udem iwumi ara tettwabud, tikkelt-a, ttwabudd i umeɣnas amaziɣ amẓabi Kamal Ddin Fexxar yemmuten deg waggur n maggu iɛeddan deg lḥebs.
I wid yebɣan ad rzun ɣer yisebtar n tesɣunt, yessefk kan ad arun deg uzeṭṭa n facebook “Tasɣunt Aselmad – La revue Aselmad”, ad d-tali s tin n tikkelt-a, s tid i d-yeffɣen yakan uqbel. Deg-s ad d-sfaydin ama d iselmaden ama d inelmaden seg yiḥricen-is iseklanen inesbaɣuren. Taɣuri igerrzen i nessaram i yimeɣriyen, deg uraǧu n usiher i tesɣunt tis ṣat, s lebɣi n yimsuddsen d wid yettarun.
Kh. A.