Accueil Tamazight Tella-d tezrigt tis 3 taggara n ddurt yezrin

Tella-d tezrigt tis 3 taggara n ddurt yezrin

22

Tella-d di taggara n ddurt iɛeddan, tezrigt tis tlata n rreḥba n udlis i warrac deg taddart n Uɛfir deg tɣiwant n Bujimaɛ. Ass-nni n lǧemɛa d ssebt 27-28/09/2019, imezdaɣ n taddart n Uɛfir n Bujimaɛ, llan di ttiɛad u deg yirebbi n yidles s umata d udlis s wuzzig. Mebeɛd tazrigt tamezwarut n 2016 d tis snat n 2018, i iɛeddan deg tegnatin igerrzen, tefka afud meqqren i tddukkla tadelsant “Amnir” n tama n Uεfir n Bujimaε, i wakken ad suddsen tazrigt-a tamaynut. D ashier i d-yettwaheggan s tallelt n Tenmehla n yidles n Tizi Uzzu, tin n usegmi d usedwel ɣer tama n Useqqmu Aɣerfan n Lwilaya (APW) n Tizi Uzzu, d wiyaḍ. Yella-d leqdic-agi adelsan n sin wussan, deg uɣerbaz amezwaru “Addar Belɛid” yellan deg tama-agi n Uεfir, anda i txeddem ddeqs n yirmad tddukkla-agi tadigant, di yal tikkelt.

D Rreḥba n udlis deg tezrigt-is tis kraḍet, ideg ttekkint wazal n 12 n tezrigin, i ixedmen timsikniyin s usenzi n yidlisen. Ad d-nedber gar-asent; Tamagit, El Amel, Richa Elsam, Jelis…atg. Am wakken daɣen, i d-llan wazal n 15 yimyura, yettarun i ugrud, i yessenzen s ubuddu idlisen-nsen, s tutlayin-a yemgaraden (tamaziɣt, tafransist d taɛrabt), i d-yerzan seg waṭas n tamiwin n lwilaya n Tizi Uzzu. Ad d-nebder gar-asen: Tinhinan Ḥarrac, Ali Ḥeǧǧaz, Racid Buxerrub, Ḥusin Luni…atg. Imsuddsen n rreḥba-a, heggan-d leqdicat-nniḍen, i d-yellan deg wahil n tezrigt-a, anda ara naf sin n yisaragen ɣef tfelsafit, yiwen ɣef tfelsafit s umata sɣur Mass Ḥerrac Ḥmed, yellan d aselmad n tfelsafit yeffɣen ɣer tasaɣt.

wis sin, yella-d ɣef tfelsafit n ugrud, sɣur Massa Marie-Laure Dupin, d taɛeggalt di tddukkla “Algerie-France Amitié” . Am wakken daɣen, ara naf isikwan (ateliers) n usuneɣ akked tɣuri, ɣer tama n umseḍsi akked useḥḥar d wayen-nniḍen. Yella-d diɣ, usarag s ssenf n table ronde, sɣur tezrigt La Pensée, i yettarun i ugrud, yezzi-d deg-s wawal ɣef wazal n udlis n ugrud. Bɣan yiεeggalen n tddukkla-agi “Amnir”, ad ẓẓun tikti n udlis, tayri n tɣuri ɣer warrac imecṭaḥ, d asebɣes daɣen i yimura yettarun i tsuta-agi. Ma ɣer taggara n ttiɛad-agi, fkan arrazen d igerdazen n usebɣes i warrac i d-yufraren deg n temsizliyin, i xedmen yakkan.

A. A.