Mbeɛd tuffɣiwin n yimdanen s iberdan 4 n wagguren-aya d yisuturen yemgaraden i terfed yal taggayt seg ugdud, tettili-d seg tikkelt ɣer tayeḍ tririt i yisuturen-a sɣur wid yeṭṭfen lumur imir-a. Gar-asen aneɣlaf n temḥaddit i yewwin yiwen n ubrid, wagi d abrid n lḥebs.
Ɣef waya, aṭas seg wid yesseftin tadrimt s txidas deg tallit n uselway aqdim, ttwaṭṭfen, ttwajerden seg waṭas n yiṣenfaren-nsen. Gar-asen Ali Haddad i yeṭṭfen tuget n yiṣenfaren, yiwen yiwen i as-yettwakkasen taggara-a. Gar yiṣenfaren-a, ad naf yella win n lebni n ukkuẓ n lebruj (les châteaux) meqqren s tallelt akked tkebbanit “Sarl By As” deg tama n Akid Loutfi di twilayt n Wehran.
D lwali n Wehran i yeddmen ṛṛay-a, seld mi t-id-wwḍen lumur s ufella. U ɣas akken takebbanit n Ḥeddad tejbed iman-is seg tikkelt tamezwarut, maca takebbanit-nni yettuxessen deg lbenyan, niqal tugi ad tserreḥ i uṣenfar, almi tessexdem twilayt iɣallen n uzayez i tt-terra tmara ad teǧǧ adeg-nni.
I usmekti, adeg-a yella deg tazwara d yiwen n uṣenfar gar yifassen n twilayt n Wehran, deg-s ad d-yili lebni n yidgan n temarrit n wurar i yigerdan d win n usteɛfu n twaculin. Ma neẓra belli Wehran yettraǧu-tt usiher anaddal agraɣlan n wuraren n yilel agrakal, ɣas akken mazal akud-is alamma d aseggas n 2021, maca yettili-d uɣiwel deg leqdic akken ara yettwaheggi kullec di lawan.
Ṛṛay-a n tuffɣa n tkebbaniyin-a, yessefreḥ ayendin imezdaɣ n tama-nni, imi nnan deg umeslay-nsen “Nesra i yidgan i icebḥen d yisenfaren ara d-yeglun s lfayda d lxedma i ugdud, mačči i yisenfaren-a meqqren s tedrimt ur nelli d ayla-nsen, s tallelt n udabu”.
Khaled Achoui.