Semmus n yiseggasen aya i as-iruḥ yiwen uzamul i tmaziɣt, wagi d Nour Ould Amara. Ilul ass n 10 deg ctember 1968 deg Ʃin El Ḥemmam , yeɣra deg uɣerbaz amenzu deg taddart n Koukou gar useggas 1974-1980. Yuɣal s aɣerbaz At Hicem, gar useggas 1980-1984 yewwi-d akayad n BEM , yuɣal ɣer tesnawit n Ben Boulaid deg Ʃin El Ḥemmam anida i d-yuwi akayad n BAC. Sakin ikemmel almud deg tseddawit. Deg useggas n 1988 d 1989, yesselmed tutlayt taɛrabt, deg uɣerbaz alemmas n Wat Hicem, seg useggas 1989 yetteki deg tiddukkla : «Si Mohend ou Mhend» deg Ʃin El Ḥemmam. Gar 1995-2000, yesselmed tamaziɣt deg uɣerbaz n Wat Hicem, almi yexdem deg tseddawit yiwen usileɣ (une formation), deg tseddawit n Ben Aknun. Mass Ould Amara Nour, d ameɣras n tmaziɣt, yennuɣ fell-as. Deg useggas n 2000, yexdem d imceyyaɛ deg Uɣmis l’Hebdo-n-tmurt. Yexdem, daɣen, deg yiwet n tedwilt n temsirin n tmaziɣt deg Berbère Télévision seg useggas 2003 almi 2011. Yewweḍ leɛfu Rebbi ass n 20 deg ctember 2011 s yiwen waṭṭan, fell-as yeɛfu Rebbi, ur ntettu ara d acu i d–yenna ɣef tmaziɣt, akken ad tidir tmaziɣt ilaq-as tira , ilaq ad tuɣal d taɣelnawt, Nour Ould Amara, ulac axxam ur yekcim ara s temsirin n tmaziɣt , yerna mačči hala inelmaden i itebɛen tadwilt-is ula d imawlan-nneɣ neɣ wid ur nessin ara tamaziɣt. Ɣef waya, ilaq ad neddu deg ubrid-is akken tamaziɣt ad tidir ad tt-naru.
Zakia Ben yahia