I lmend n tirza i t-id-yewwin ɣer Bgayet ass n 14 furar yezrin, iga uneɣlaf n wafud, Mass Mesṭafa Gituni, yiwet n temlilit akked yimḍebbren, taɣamsa d yiselwayen n tɣiwanin, ideg i d-yerra i yisteqsiyen-nsen ɣef waṭas n tlufa yerzan s umata taneflit di temnaḍin. Ɣef wayen yerzan tuqqna n Ayt Smaɛel i uẓeṭṭa n lgaz n lḥiḍ, neɣ n temdint, iwekked-d uneɣlaf di tririyin-is d akken ad yili dayen uḥerrek n yiqeddicen deg wussan-a i d-iteddun.
Aya seld mi yeddem awal lmir n Ayt Smaɛel, Mass Sadeq Rebbaɛi, yemla-as akk uguren icudden ɣer usenfar-a deg tɣiwant, abeɛda aɣilif n teɣsert n usiweḍ i mazal ur temmug ar tura ɣas yegget usuter. Si tama-nsen, imi ḥeḍren ula d nutni i temlilit, ccektan lemyur n Yiderginen d Tsexriwt, Racid Xalef d Maǧid Buǧiṭ, I uneɣlaf ɣef uɣbel-a n lgaz di tɣiwanin-nsen d uɛeṭṭel n usenfar akken ad d-yettwasiweḍ ɣur-sen.
« Di leɛḍil ad yemmag uẓeṭṭa n usiweḍ n lgaz ɣef teɣzi n 12 n yikilumitren, i sḥebsen kra n medden, ssutureɣ ad d-ttwaqqnent tɣiwanin n Ayt Smaɛel d Tsexriwt seg temnaḍt n Seṭṭif, i ibeɛden s 150 n lmitrat », i d-yenna uneɣlaf. « Aya d tifrat iɣesben, alamma yefra wugur n texxamin n usgunfu i snat n tɣiwanin-a », i d-yerna daɣen. Ad d-nesmekti d akken ɣef wayen yerzan tugin n yimdanen i usɛeddi n lgaz seg wakal-nsen, iwessa Mass Gituni iselwayen n tɣiwanin, ad tteffɣen sya d tasawent ɣer unnar akken ad mmeslayen d yiɣermanen, ad ten-id-qennɛen send ad yebdu usenfar.
M. K.
