Taggara n ddurt yezrin, thegga-d Tdukla n yigujilen ‘’Ixulaf’’’ n Uqbu yiwet n temlilit n useεlem mgal leqher i ttidiren yigerdan s sseba n yimenɣiyen i d-yettilin di twacult, gar yimawlan-nsen, deg tudert n yal ass. Timlilit –agi, ḥedren deg-s yisdawaniyen imussnawen n tussna n tmetti, neɣ d les psychologue akked yibugaṭuten i d-yemmeslayen ɣef wayen i d-yeqqar lqanun d craɛ n tmurt n Lezzayer deg taɣult-agi. Am wakken, ḥedrent daɣen waṭas n tduklin i d-yerzan si tamiwin n tmurt yemxalafen n tmurt n Lezzayer, ladɣa tid yettḥaraben ɣef yizerfan n yigerdan. Asarag amenzu, yewwi-d deg-s awal Docteur Farid Trik , d aselmad di tesdawit n Bgayet ɣef wayen i d-gellun yinebran gar yimawlan ɣef ugrud, yenna-d : ‘’luɛara i d-yettbinin ɣef kra n yigerdan di lakul neɣ di tmetti s umata, tettuɣal ɣer liḥala deg ttidiren yigerdan-agi deg yixxamen-nsen, ladɣa wid imi msebḍan yimawlan-nsen’’, ikemmel deg wawal-is yenna-d yiwet n tikti s wazal-is :’’ ilaq asileɣ i uheggi n urgaz d tmeṭṭut i tudert n zwaj uqbel ad xedmen tameɣra’’. Deg usarag wis-sin, yella-d wawal ɣef leqher s umeslay i d-yettilin di twacult i d-gellun s lemḍerra meqqran ɣef tudert n yigerdan : ‘’aṭas n yigerdan i reglen deg yixxamen s sseba n umeslay qessiḥen sellen deg yimi n yimawlan’’, i d-yenna Mass Bouiche Mehrez, d asdawan d amnadi di taɣult n tfelsafit. Ma yella deg uskasi, yezzi usteqsi s waṭas ɣer wayen i d-yenna lqanun n tmurt n Lezzayer ɣef uzref n ugrud. Ma tezmer tdukla ad tessiwed acetki s axxam n craɛ ? D isteqsiyen iɣef i d-yerra imḍebbar n sandika n yibugaṭuten n lwilaya n Bgayet , Mass Idjed Mokrane anda i d-yenna : ‘’lqanun iban, aḥareb n uzref n ugrud s wazal-is , maca d aḥesses d usaɛlem i ixussen , aṭas ur nettruḥu ara ad cetkin, wa d leḥya , wa d lxuf’’. Ma yella d icetkiyen n tdukliwin, yenna-d belli ur sent -yesmiḥ ara lqanun :’’ tiddukkla, tezmer kan ad tseɛlem kan iɣallen n laman neɣ le procureur s wayen yeḍran d ugrud’’. Tekfa temlilit s kra n lewsayat uɣur i d-fɣen wid iḥdren, ama d imussnawen i d-yefkan isaragen, ama d wid n lɣaci –nniḍen, imi ula d lɛama iḥedren rran-d ɣef kra n yisteqsiyen i asen-yettunefken mi tebda temlili . ‘’ilaq –aɣ, ad naki wa ad d-nekker ɣef zik mgal aqhar n yigerdan, imi leqher yella deg umdan, ilaq ad iɣelleb iman-is, ib wakken ad seḥbiber ɣef tarwa-s d twacult-is’’, i d-yenna Mass Zaidi Djarah, aselway n tdukla Ixulaf.
B.Benhamouche