Taddart n At Sasi i yettabaεen ɣer tɣiwant n Yiɣil Ɛli, ttidiren yimezdaɣ-is lḥif d ameqqṛan. Ayagi, imi imḍebbṛen n tɣiwant-nsen, fkan afus ɣef taddart-a. Iɣeblan n temnaḍt-a, ur llin d imaynuten. Dɣa newwi-d ameslay ussan yezrin ɣef yir liḥala n yiberdan-nsen, ladɣa segmi i asen-xedmen lgaz n temdint. Rnu i waya, tamsalt n ugudu, i yellan d aɣbel si zik, mazal-itt ar ass-a. Ayen yessewhamen ugar, d abrid aɣelnaw, i rran d adeg i udeggeṛ n uhicuṛ.
Aneggaru-a, yekkes-as tugna icebḥen i taddart. Seg tama-nniḍen, ur sɛin ara yimezdaɣ n At Sasi aman n tissit, acku wid-nni i d-yettasen deg yiteyyuten, ur sliḥen ara. Daymi i d-ttaɣen aman n tissit. Ma yella d kra n yimezdaɣ, ttefɣen beṛṛa n taddart ɣer tliwa, ttagmen-d aman n lεali syin-a. Ad d-nesmekti belli ula d aman n useqdec, xuṣṣen nezzeh, d ayen i yeǧǧan axeddam n waman yettara-ten-id seg tikkelt ɣeṛ tayeḍ. Lameεna ussan yezrin, uɣalen neqqḍaεen yakk, dɣa ugar n 20 n wussan, ur d-teɣli tiqqit deg tberninin n yixxamen. Lexṣaṣ-agi n waman, yesnulfa-d zzεaf d ageεmir deg wulawen n At taddart. D ayen i ten-yeǧǧan nnejmaεen, mcawaṛen gar-asen.
Γer taggara, ffɣen-d s ṛṛay d akken ad bellεen Axxam n tɣiwant, ḥala ma yerra-d uselway-is i wayen i ssuturen. Γef usentel-a, yenna-aɣ-d yiwen n ubabat: « bezzaf fell-aɣ, neṣbeṛ ayendin, lameεna yal taɣawsa, tesεa tilisa. Ass-a ula d leǧyub-nneɣ ur sliken ara, yiwet n lpila n waman teswa azal n 1 500 n yidinaṛen. Amek yiwen ur yufi ara s wacu ara yidir, ad d-yettaɣ ula d aman ? ». I yisalli, imezdaɣ n taddart n At Sasi, bellεen Axxam n tɣiwant kṛaḍ n wussan. Ayagi yella-d ussan n 2, 3 d 4 duǧembeṛ yezrin. Ma yella d aselway n tɣiwant seg tama-s, yefka-sen azref, yerna iεuhed-iten belli ad yefru akk ayen i ssuturen deg wayyuren i d-iteddun. Ma yella d aman, yenna-sen belli aɣbel yella deg tɣiwant s umata. Acku bɣan ad sleḥqen aman deg yiteyyuten imeqqṛanen, dɣa ttεawaden-asen axeddim.
K. K.