Accueil Tamazight Ulac tiddukkliwin n Ayt Smaɛel

Aberreḥ n yigemmaḍ ɣef yisenfaren : Ulac tiddukkliwin n Ayt Smaɛel

70
- PUBLICITÉ -

Aseggas tura segmi i d-yessawel Useqqamu Aɣerfan Awilay n Bgayet i tddukkliwin i yesɛan isenfaren, maca srant i tallelt si tama n tedrimt akken ad ten-rrent d tilawt. Ḥawla n tddukkliwin turmidin i ijerrden iman-nsent seg yakk tiɣemmar n Bgayet, ḥala tid n Ayt Smaɛel, am tddukkla tadelsant Adrar n Fad d tddukkla Tiɣri. Armi d ussan-a kan, yerra-d Useqqamu Aɣerfan Awilay n Bgayet igemmaḍ, banent-d tddukkliwin i d-yesfaydin s tallelt tadrimant i usemres n yisenfaren-nsent deg unnar.

- PUBLICITÉ -

Di tɣiwant n Ayt Smaɛel, yella yetturaǧu ad terr i tiɣri-a xersum yiwet n tddukkla, maca ur d-yelli waya ɣer taggara. D ayen i yeǧǧan kra n yimezdaɣ steqsayen ɣef tsebba n waya, ulamma llan ẓran yakan amek yenṭer iseggasen-a ineggura umussu asddukklan di temnaḍt-nsen. Imi seg wayen yakk i d-yennulfan d tiddukkla, ala yiwet neɣ snat i d-yettbanen seg tikkelt ɣer tayeḍ. «Neẓra yella wugur daxel umussu asddukklan n tɣiwant-nneɣ. Imdanen, ur sɛin ara lebɣi i leqdic, ixulaf ara ikemmlen abrid uqan, maca yewwi-d tili ahat tjerred ulamma yiwet n tddukkla sɣur-neɣ.

Lemmer i yettili umciwer tili iban-aɣ-d usenfar adelsan neɣ inmetti ara nceyyeɛ i Useqqamu n twilayt n Bgayet », d awal n yiwen n umeɣnas aqbur n Ayt Smaɛel. Ad d-nesmekti d akken yewweḍ umḍan n tddukkliwin i d-yesfaydin s tallelt-a n Useqqamu Aɣerfan Awilay n Bgayet ɣer 48. Seg-sent ad d-nebder tiddukkla Talsa n Tmezrit, tiddukkla « Tadukkli n Ayt Ɛisa » n Uweqqas, tiddukkla Ixulaf n Uqbu, Tiddukkla Awal Issawal n Melbu, Tidukkla « Oxy-jeunes » n Yiderginen, tiddukkla Idles n Draɛ Lqayed, Tiddukkla Itri n Yiburayen n Tifra d waṭas-nniḍen. Ma d azal n tallelt-a, tezmer ad taweḍ armi d 100 n yimelyan neɣ ugar.

M. K.

- PUBLICITÉ -