Ddeqs-aya segmi bdan lecɣal n uɣizi n yiberdan deg tuddar n Yiɣil Ɛli, i usεeddi n yiteyyuten n lgaz. Win yerzan dɣa ɣer dinna, taɣewsa tamezwarut ara iger awellih ɣug-s, d addad n yiberdan-nsen i ixeṣṣṛen ugar n wamek i llan yakan, ladɣa segmi i bdan lecɣal n uɣizi-a. Aṭaṣ i sεeddan yimezdaɣ n temnaḍt-a, abeεda di tegrest yezrin. Imi ččuṛen yiberdan d aluḍ, dɣa mačči kan d tikli n yimdanen i iweεṛen, ula d tikeṛyas teddunt s tmara. D ayen i yeǧǧan At tuddar n Yiɣil Ɛli, ḥeṛṣen aselway n tɣiwant-nsen i wakken ad iɣiwel deg uxiddim-agi. Aneggaru-a, seg tama-s, yexdem ayen iwumi yezmer, bac ad kfun lecɣal-is uqbel tagrest n useggas n 2020.
Γas ma yella mazal ur ttwaqeεden ara yiberdan seld imi kfan lecɣal n uɣizi, lameεna, ddren yimezdaɣ n tuddar n Yiɣil Ɛli ass n 28 tubeṛ yezrin, taswiεt n tumert ur tt-ddren ara uqbel. Ayagi imi yeṣṣenṣeb lwali n Bgayet aselḥu n lgaz n temdint di tɣiwan-nsen. I usmekti ugar n 800 n twaculin i yesfayden seg lgaz-a. Gar-asent tid n taddart n At Sasi, d tin n Tzayert, d tiyaḍ. Seg tama-nniḍen, llant tuddar mazal ur yelḥiq ara ɣuṛ-sent, am tigad i d-yezgan deg udrar. S unamek-nniḍen, ugar n 3 000 n twaculin i mazal ur yelḥiq ɣur-sent lgaz. Ayen yesṣefṛaḥen ugar, d awal n uselway n tɣiwant n Yiɣil Ɛli, imi deg-s, yefka-sen lweɛd i yimezdaɣ n tuddar-a, d akken ula d nutni ad ten-yelḥeq lgaz uqbel n taggara n useggas-a.
Yerna ifuṛeṣ tagnit, yemla-as i Lwali, ɣef yir liḥala i tettidir tɣiwant-nsen, i yuɣalen di rrif, ɣas ma yella tettwassen s umezruy-is, d teḥdeq n yimezdaɣ-is. Imezdaɣ n tɣiwant, ttun i kra n yesragen iɣeblan-nsen, ladɣa imi aṣenfaṛ-a yusa-d di lawan-is, dɣa yenna-aɣ-d yiwen seg taddart n At Saci: « Nefṛeh nezzeh s lgaz-a, akka tura ad tekfu fell-aɣ teεkemt n tqerεet n lgaz xerṣum. Ahat d lfal yelhan ara d-yawin i temnaḍt-nneɣ tiɣawsiwin-nniḍen ». Ma yella d Lwali, yefka-sen lεehd belli ad d-yeεṛeḍ ad iqeεεed iberdan-nsen, u ad d-yelhu d yiɣeblan n yilemẓiyen-nsen.
K. K.