Gar yiṣenfaren iɣef i d-yettili ureqqeɛ d uwenneɛ deg temdint n Wehran, segmi iga lwali kra n tuffɣiwin deg wussan iɛeddan, ad naf tawenza Front de mer. Tirza-a iga uqerru amenzu n twilayt, tegla-d s useḥres deg wawal-is. Yemmeslay d wid yeṭṭfen iṣenfaren akken ad yili uqader n wakud d keffu n yimahilen-nsen deg lawan, acku ula d netta usan-as-d leryuy s ufella akken ad yili uɣiwel d keffu n yiṣenfaren-a, ladɣa wid yellan di tlemmast n temdint iɣef ttɛeddayen yimdanen ṣṣbeḥ tameddit. Front de mer d yiwen gar yizenqan mucaɛen deg temdint n Wehran, imi d adeg yehhuskin s waṭas, ma neẓra ɣer tama n wadda, iqubel-it-id yilel s tizzegzewt-is, ɣer tama-nni akkin d asagen ameqqran n Wehran i ixedmen deg uzal, deg yiḍ, ukessar d sin n yiberdan imeqqranen yettawin yettarran. Ma deg ubalku iɣef ttmuqulen medden ɣer ccbaḥa n yilel d yiɣerruba, ad naf llant tesɣimiyin n usɣar d tid n wuzzal, ɣef teɣzi n ubalku-a ara yesɛun azal n 200 n lmitrat, d tizdayin ɛlayen i yettwaẓẓan yal 10 n lmitrat, d tid i as-d-yernan ccbaḥa i umkan-a ladɣa deg yiḍ imi ceɛlent s teftilin n yal ini. Yettwaḥasab umkan-a ihi, gar yidgan uɣur rezzun yimerza iberraniyen i d-yettasen ɣer tmanaɣt n umalu ɣer tama n yimukan-nniḍen icebḥen, acku daɣen d lebni i d-teǧǧa Fransa. D azal yesɛa umkan-a deg tmerrit i yeǧǧan lwali ad yesseḥres akken ad yettwacebbeḥ ugar. Ɣef waya i d-yella uqlaɛ n tkarlajin yellan zik d tiqdimin, ad ttwabeddlent s lkarlaj meqqren i d-yeffɣen d amaynut akken ara d-yernu deg ccbaḥa n umkan. Si imi ara yekfu ureqqeɛ n tɣerɣert-is, ad d-yili uɛiwed n ssbiɣa i leḥyuḍ n ubalku akken ara igerrez ugar, u ad yetteɛǧab wid yettɣimin din.
K. A.