Ddeqs n yidlisen i d-yessuffeɣ umaru Mhenni Xalifi. ama deg wayen yeεnan tamedyezt, tullisin, neɣ ungalen. Ungal-is Imehbal, yewwi s yis-s arraz n Asya Ǧebbar deg useggas n 2018. Ur yeḥbis mmi-s n temnaḍt n At Smaεil deg yiḥricen-a, lameεna, yessuffeɣ-d daɣen adlis n uẓeṭṭa n wawalen s Teqbaylit. Ula d arrac imecṭaḥ, ixemmem fell-asen Mhenni Xalifi mi asen-iga amur ama di ccna ama deg tira, imi yessuffeɣ-d yakan yiwet n tezlit d teqsiḍt i nutni. Abrid n tmussni, d unadi i yefren Mass Xalifi, yeǧǧa-t ur yessin d acu d εeggu. Neɣ s unamek-nniḍen, Mhenni yettwali belli Taqbaylit tesra i win ara iqeddcen fell-as. Daymi i yezga yessewham-aɣ yal tikkelt s umaynut-is. Dɣa, ussan-a kan yegla-d s udlis-nniḍen.
Ad d-nesmekti d akken, amaynut n tikkelt-a, yemgarad ɣef wiyaḍ, axaṭer d tajmilt i yerra i yiwen unaẓuṛ ameqqṛan i yuklalen leqder, wagi d Zeddak Mulud. Si zik yella Mhenni seg wid yeṭṭafaren tamedyezt-is. Γef wannect-nni, i d-iεewwel ad as-yexdem taɣuṛi i tuget n yisefra-s n temḥaddit. Zeddak Mulud, anwa Azwaw ur t-nessin, netta i yellan d ṣṣut i d-yessakin s tezlatin-is amur d ageεmir seg tmetti ɣef wazal n yidles-nneɣ. Zeddak, yettεuzzu Taqbaylit-is, d win ur nettnuz, ɣas yesεedda lḥif d aberkan. Yecna ɣef yidles aqbayli, ansayen-is, amezruy-is, d lḥif i tesεedda teqbaylit.
Γas ma yella yecna ɣef yisental-nniḍen, meεna yefka azal ugar i Teqbaylit. Akken i d-nebder yakan, adlis-a n Mhenni iwumu yefka azwel « Zeddak Mulud tamḥaddit d tmedyezt », yebḍa-t ɣef yiḥricen. Aḥric amezwzru, yefren deg-s Mass Xalifi ad yexdem tiɣuṛiwin i kra n tezlatin timḥaddiyin n Dda Lmulud, anida i d-yesbeyyen tamḥaddit-is deg waṭaṣ n tlufa. Ma yella d aḥric wis sin, d tira n yisefra n unaẓuṛ segmi i yebda amecwṛ-is n ccna ar ass-a. I wakken ad yeṣṣiweḍ tamedyezt n Dda Lmulud i yilemẓiyen s tira iweqmen. Neɣ bac ad gzun yilemẓiyen ugar anamek n kra n tezlatin-is.
Aḥric wis kṛaḍ, d yiwet n tdiwennit i as-yexdem Mhenni i Dda Lmulud, taneggarut-a urεad i d-teffeɣ deg yiɣmisen. Deg-s dɣa sqerdcen buhan n temsal, ladɣa ɣef tmagit, idles d umezruy.
Di taggara, yewwi-d ad d-nebder d akken, adlis-a yeffeɣ-d s tallelt n Tiẓṛigin n Ccix Muḥend Ulḥusin. Dɣa nessaram-asen afud igerrzen, ama i umaru, amezṛag neɣ i unaẓuṛ-nneɣ Zeddak Mulud.
K.K.