Tettuɣal-d Tefsut n yimaziɣen s lfuruḥ d tmeɣriwin yal mi ara d-tezzi. Ɣef teɣzi n mraw n wussan ineggura n yebrir, ttilin-d leqdicat idelsanen yemxalafen; tuget d wid i d-ssuddusent tddukkliwin tidelsanin. 20 yebrir, daɣen, d yiwen n wazemz i d-yettuɣalen s waktay-nniḍen, imi ass-nni i aɣ-yeǧǧa yiwen wudem n ccna d ssinima n teqbaylit zeddigen. Wagi d acennay Amroun Mhenni i tewwi tmettant deg wass n 20 yebrir 2012. Ɛemrun Mhenni, d anaẓur aqdim.
Ilul ass n 3 duǧember 1938 deg Buzgan. Seg temẓi-s i yebda ccna, mi akken iḥeffeḍ s wul tizlatin n Sliman Ɛazem. Uqbel ad tekker tegrawla n Lezzayer, iruḥ ɣer tmurt n Fransa, yekki di tfidiralit n FLN deg temdint n Marseille. Mi d-yuɣal ɣer tmurt seld tagrawla, yekcem ɣer rradyu, din i yexdem geddac n tceqqufin n umezgun akked wudmawen yettwassnnen deg umezgun n teqbaylit. Ma nuɣal-d ɣer ssinima, yekki deg waṭas n yisura yesɛan inumak lqayen n tmetti d wayen icudden ɣur-s, gar-asen Aḥlil aḥli, Axxam n Dda Meẓyan… Ma d ccna, ad naf gar tezlatin yettwassnen i d-yeǧǧa Mhenni Ɛemrun, ad d-nebder deg-sent Tettcekkireḍ-iyi-d jeddi-k, A jeǧǧiga.
Kh. A.