Uguren ttidiren yimezdaɣ n tudrin d tɛekkmin yezgan fell-asen d unḥerrak i d-yettilin di tmurt qrib 6 n wagguren-aya, yessaweḍ aṭas seg yimezdaɣ-a yenṭerren ad d-sbeggnen lɣiḍ-nsen s tarrayt neɣ s tayeḍ.
D ayagi i yessawḍen imezdaɣ n taddart n Tifra yettabaɛen asun n Sidi Ɛic, ad d-ffɣen si tsusmi-nsen, s umdal n tɣiwant, qrib tura 25 n wussan, s lebni n yiwen n uɣrab d uslaɣ-ines deg wadeg n tewwurt n unekcum n berra. S wakka, ulac win i izemren ad yekcem. Tigawt-a, tella-d seld axebber n uselway n tɣiwant s umdal-nsen i wammas ma ur d-yerri ara i yisuturen-nsen, dɣa yesɛuẓẓeg fell-asen, d ayen i ten-yeǧǧan ad xedmen anejmuɛ iḍ n 1 yulyu 2019 deg tejmaɛt n taddart-nsen u ad ddmen s umtawi ṛṛay n umdal n tɣiwant alamma yella-d unadi meqqren deg lecɣal n uselḥu-ines d tririt i wayen yakk i ten-iceɣben, ma ulac, axxam n tɣiwant akka ara yeqqim yemdel.
Gar yisuturen i d-jerden deg yiwet n tifert i yuznen ɣer waṭas n teseqquma n unadi deg twilayt n Bgayet, ad naf : Tasastant ɣef lumur n uselḥu n tɣiwant d uḥbas n yiṣenfarten xemsa n yiseggasen ɣer deffir. Mi ɛeddan 15 n wussan ɣef tigawt-a, ulac acu d-yellan d amaynut, usan-d diɣ yimezdaɣ, s umecṭuḥ d umeqqran gan ass n yibeddi sdat n tewwurt-a, xedmen kra n tugniwin i d-sersen deg yiẓeḍwa inmettiyen akken ad walin merra addad n tɣiwant-nsen u ad ssutren s tidet u s lɛejlan taseqqamut n unadi ara itebɛen ladɣa aselway n tɣiwant deg waṭas n temsal.
Ayagi ur yessusem ara fell-as uselway n tɣiwant Rabeh Meksem i d-yerran si tama-s deg yiwen n usebter, belli wigi i d-yellan deffir n tigawin-a, sɛan iswan u mačči s lebɣi-nsen. D asmekti kan, ilindi akka imir-a daɣen medlen-as daɣen taɣiwant i teɣzi n 3 n wussan s uɛelleq n teqreɛtin d yibidunen n waman ilmawen ɣef tewwurt, acku sɛan ugur n lixṣaṣ n waman, ɣas ma d tudrin i d-yezgan ddaw n yicerfan d yidurar n teẓgi n Ukeffadu, maca yir asuddes d lecɣal n lxedma n uɛawed d tsertit ur nwulem ara, yessaweḍ at taddart n Tifra ad ṭṭfen deg wawal-nsen, ur as-berrun ara alamma tella-d tsastant n tidet. Cwi kan tella tsekka (antenne) n uḍewwar n Yikeǧǧan, zemren yimezdaɣ n tɣiwant ad d-ssuffɣen syin leɛqud n tlalit d wid n nnekwa d tnezduɣt. Deg uraǧu n tifin n tifrat i wugur-a i ttidirent waṭas n tɣiwanin deg tmurt n Leqbayel.
Kh. A.