Mazal tettkemmil tsestant ɣef tedyant-nni n l’OPGI iɣef yegget wawal da deg temdint n Bgayet. I usmekti, tadyant d tin icudden ɣef wamek i yesselḥa unemhal aqdim akked wid-is deg ssrabes yemxalafen takebbanit-a deg useggas 2003 almi 2008.
Beɛd ccreɛ-nsen ayyur yezrin, tasestant (enquête) tettkemmil. Tikelt-a, ijadarmiyen rzan ɣer yiwen n uxxam i yezgan deg 392 tmezduɣin, lbaṭima B1. Akken d-qqaren, yefka-yas-t unemhal aqdim i uletma-s izedɣen deg Qsemtina. Meɛna wid yettilin din d arraw-is. Axxam yeṭṭef seg ṭṭerf ɣef ṭṭerf n lbaṭima, ziɣen snat n tmezduɣin iwmi ihudd lḥiḍ akken ad as-yuɣal d axxam i netta.
Akken d-nnan wid iḥeḍren din, imi fukken deg usewwer n uxxam, wwin yid-sen kra n yisafsaren i ufan din, rnan mmi-s n unemhal imi yella netta d yiwen n umdakel-is daxel n tmezduɣt-a.
D. I.