Yella ussan-a iɛeddan di Bgayet unemhal amatu n Uxxam aɣelnaw n yizerfan n umeskar d yizerfan inaragen (ONDA) Mass Sami Bencix, i lmend n usarag i d-iga deg usensu Crystal. Tessemlal-it-d tegnit-a akked waṭas n yinaẓuren n waɣir n Bgayet teɣzi n wugar n usrag d akud. Aṭas n yicennayen yettwassnen i iḥeḍren i ttiɛad-a, gar-asen ad d-nebder Buǧemɛa Agraw, Murad Ɛedwan, Ɛemmur Ɛebdennur, Ɛebbas n Ayt Rẓin, Yasin Zwawi, Qasi Busaɛed d wiyaḍ. Mi d-yesmekta inaẓuren ɣef wazal n uḥuddu n yisnulfuyen-nsen sɣur Uxxam aɣelnaw ONDA, yenna-d unemhal-is belli ihegga, ad yesbedd di Bgayet aɣerbaz n tẓuriwin ɣer sdat, abeɛda ma ur d-mlalen ugur deg tifin n unnar anda ara yettwabnu.
Deg wawal-is daɣen, yeshedden Mass Bencix Inaẓuren ɣef wayen yerzan lɣiba n tegnatin ideg zemren ad cnun, am yixxamen n yidles. Llan wid i as-yemmeslayen ula ɣef uɛeṭṭel i d-yettilin send ad ṭṭfen izerfan-nsen. Ad d-nesmekti d akken aṭas n tlufa iɣef i d-yemmeslay iseggasen-a ineggura unemhal n ONDA ɣef wayen yerzan aqader n yizerfan n umeskar. Imi yella iɛeyyen-asen i yimḍebbren n tregwa tusligin i yellan sseqdacent ayla n tgemmi war ma xellsent izerfan n umeskar. Ama d aẓawan neɣ d tugna, yella yenna-d Mass Bencix ilaq fell-asent ad ttxellisent izerfan n umeskar, akken ur yettili ccɣel d tukerḍa n uzref n unaẓur. Dima deg ubrid n uḥuddu ɣef unaẓur d usnulfu n wallaɣ, yella isuter unemhal amatu n yizerfan n umeskar ula d takebbanit tameqqrant Google akken ad d-tettak izerfan i yinaẓuren i yesrusuyen di Youtube iqeddicen-nsen n tẓuri. Ma nemmeslay-d ɣef Uxxam-a i yettḥuddun izerfan n unaẓur, yesɛa, armi d send ilindi, ugar n 18 000 n yiɛeggalen. Ma seg Bgayet, llan deg-s azal n 2 000 n yimeltaɣen.
M. K.