Γas ma tɛedda-d seg kra n yilem taggara-ya almi yeḥbes uzgen n leqdic-is adigan, yettusemma ayen tella txeddem i ubaɣur n yilemẓiyen n temnaḍt n Ayt Smaɛel, maca atan usan-d yineɣmisen i d-yettawin amaynut yessecrahen ɣef ubeddel n waddad i iteddun ad d-yeḍru deg urebbi n Tdukkla Tadelsant Adrar n Fad, i yesɛan deg waya qeddac tannumi ad tesḥerrek akk ayen tla d iferrawen. Annect-a lḥasul ad yili s tuɣalin i uqeddic n tgezmiwin (sections) n tdukkla.
Am ugraw n uẓawan, imi i d-banen ddeqs n yilemẓiwen ɛewwlen ad ṭṭfen tamasayt (responsabilité), ad gen tadukkli deg umaḍal n tezmilin, ma neẓra ḥaca ssuturen kan allalen.
Asnulfu n terkeft n warrac i umezgun, i ur nelli d ayen isehlen ḥawla neɣ d ayen iheggan yakan, maca lemmer zun ad d-yili uzedmer i tiɣri, ad d-ttwasersen akk wallalen i ilaqen i uzday-is, seld acḥal d ayyuren tura segmi teḥbes.
Amaynut nniḍen, d tiɣri tayeḍ i tuɣalin s annar n umeqyas n yimedyazen n taddart ; ameqyas-a n at wawal, ilaq ad d-nini llan kra n yimedyazen sɛan d tidet lebɣi ad t-id-rren iqeddec, ad d-ttilint temliliyin, ad yettili umciwer i usgeɛmer n uswir n tmedyezt, maca llan seg tama nniḍen wid ɣef ur teḥma maḍi tekti, ur d-tṭir akk deg-sen ɣas ttbanen-d tikwal ḥemmlen ad d-bedren ayen qeddcen, neɣ ad ɛanden wiyaḍ. Rnu, deg temnaḍt n Udrar n Fad, aṭas n yimedyazen i yellan, ama d wid yettfersen, neɣ d wid i d-ibanen d imaynuten, ihi d ibujaden.
Mhenni Xalifi