Ffɣen-d Yicawiyen deg temdint n Batna ass-nni n, ahad yezrin, deg yiwen ibeddi, sdat n tenmehla n usedwel n twilayt-a. Tella-d tigawt-a i wakken ad ssutren seg unemhal n usedwel n tama-a d wid teɛna temsalt, ad tetttwaselmad tmaziɣt s tarrayt timḥettemt, am yakk tutlayin d yilmuden-nniḍen. Gar wid i d-yeffɣen, ad naf imawlan n yinelmaden, tiddukkliwin, iselmaden yettmahilen deg temnaḍt-a n Yicawiyen, imdanen-nniḍen d kra n yinelmaden isnawiyen d wid n uɣerbaz alemmas.
Tigawt-a, tusa-d seld leḥris i d-yettilin sɣur tadbelt ɣef yiselmaden n tmaziɣt, d usuter diɣen n kra n tamiwin-nniḍen n tmurt i wakken ur teqqar ara tarwa-nsen tamaziɣt, am di Blida, anida i d-ffɣen kra n yimawlan (ur ttawḍen ara gar 15 d 20 yid-sen), sersen idlisen n tmaziɣt ɣef tewwurt n uɣerbaz. Gan-asen tugniwin u ssuzren-ten-id deg yiẓeḍwa inmettiyen, d ututer akken ad d-ḥebsen tarwa-nsen deg walmud n tmaziɣt.
Ma d timental iɣef sennden, d tiqdimin-nni, gar tewɛert n tutlayt tamaziɣt i tigzi d tmerna n taẓayt i wahil. Ɣef waya i mtawan yimezdaɣ n Tbatent ɣef yiwen wawal, «Imi deg wakal n yibabaten d lejdud-nneɣ imaziɣen i nettidir, ihi yessefk ad nesselmed tutlayt n tjaddit war leqyud neɣ isuḍaf», i yenna yiwen uselmad.
Di lweqt anda timura n tmazɣa ssuturent ugar n uzref i tmaziɣt, nnig n wayen akka tewweḍ imir-a, am di Lezzayer, anida yuɣal yixef n useggas amaynut d lficṭa taɣelnawt, neɣ di tmurt n Lmerruk i yezgan ssuturen tilelli ara yerren tutlayt n umezruy-nsen ad teṭṭef yakk imeḍqan n tmurt. Di lweqt ula di Libya, tessuffeɣ-d teɣlift n usedwel isalli ussan-a kan i d-yeqqaren tuɣal tutlayt n tmaziɣt d almud unṣib deg wahilen n usegmi n tmurt-a.
Kh. A.