Ddurt-agi yezrin, ass n 17 yennayer ideg nella, agraw n tddukliwin n tγiwant n Yillulen n umalu s lemεawna n tγiwant-agi, sudsen-d yiwet n temlilit taseddawant, anda isqardcen s telqay amezruy n tejmaεt leqbayel, amad taseddut, assa&gamma,; izarfan d waṭas niḍen. Akken id-wwin awal γef ayen yerẓan taddert ass-a. Taddert, d yiwet n tkemmict n wakal i d-yezgan deg wedrar Aẓar n taddert yekka-d si tudert, imezdaγ-is am watmaten, zzin aεrur-nsen i berra, ttidiren amzun d yiwet n twacult. Taddert tebḍa d iderma, deqs n lecγal d tγawsiwin iten-yesdduklen, ibardan, timeγriwin, lğanazat, iγeblan n tmetti d waṭas niḍen. Taddert tesεa taseddut d yisuḍaf iten-iselḥayen, yal win ara yefγen abrid at-xeṭṭin, naγ ma yella iεuṣṣa at-sufγen di ttewfiq n taddert, syen ad-ihağar taddert niḍen. Taddert am yiwen n wexxam, tettili tegmat gar wid yettidiren deg-s, ttemεawanen akken ad-refden aman-nsen, ami yal tallit ttgen tiwiziwin, ticemliyin d waṭas niḍen. Tezzin i yiγeblan d wugguren akken taεkkemt ad-tifsus fell-asen. Dγa nwala merra d akken deqs n wansayen i yarẓan taddert ass-a. imi tudsa tbeddel udem rnu isuḍaf ttwarekḍen. Γef aya, agraw n tddukliwin n tγiwant n Yillulen umalu n wammas n Wizgan, uḍnen aγbel, d annect-a iten-idegren sudsen-d yiwet n temlilit taseddawant ass n 17 yennayer ideg nella, deg uγarbaz alemmas Hadjeb Muḥend uyidir id-yezgan di tlemast n tγiwant n Yillulen umalu, anda i ḥedren deqs n yiselmaden n tseddawiyin yemgaraden n Lmulud At-Mεemmer n Tizi-Wezzu, d Σebdaraḥman Mira n Bgayet, ger asen Allam Said d Kenzi Σezdin, Arezqi Hammoum, rnu imnuda i ttewxeṣen deg yeḥricen yemgaraden akked yemyura, ger-asen, Muḥend Larbi Tiyeb, Moussouni Akli, ulebsir Racid d waṭas niḍen. Imsaragen win-d awal γef tejmaεt n taddert d wayen id as-d-yezzin, d wayen i yarẓan taddert ass-a, am twenaḍt, tadamsa, iγeblan n tmetti d tagnit tamatut ideg tettidir taddert. Iswi n temlilit-agi taseddawant d tiririt n wazal i tejmaεt n taddert i yellan d laεnaya, d ajgu fi tressa tugtud d tdukli.
Islam Bessa