Urɛad yezgin wayyur-a n ɣuct, lɛesker n tmurt n Lezzayer (ANP) nɣan 5 yirebraben deg twilayt n Bgayet. Aneggaru d win i tenɣa ddurt yezrin deg temnaḍt n Udekkar.
Tadyant, nnan, tebda ɣef 2 tmeddit, afella taddart n Tkamra i d-yezgan ɣef uẓelmeḍ n ubrid aɣelnaw w-26 qbel taɣiwant n Udekkar deg teẓgi n Ukeffadu. Rrsas ixebbeḍ mi yemlal lɛesker d yiwet n terbaɛt n yirebraben i yellan din. Ssawḍen iɛeskriwen ad nɣen yiwen n urebrab, ad d-rren daɣen kra n sslaḥ.
Tamnaḍt n Bgayet, tella d adeg n usteɛfu d usgunfu i yirebraben n Qaïda n lmeɣreb. Meɛna, iseggasen-a ineggura, tuɣal d amkan ideg ttnejmaɛen yiqerra n Qaïda i uheyyi n txazabiyin deg twilayin-nniḍen. Aya, iḥettem lɛesker n tmurt (ANP), ad sḥersen tagnit fell-asen. Ayen din yibarajen i d-sbedden deg yiberdan ama d wid i d-yessekcamen ɣer twilayt, ama d imeẓẓyanen-nni gar tɣiwanin. Ayen din, daɣen, n ẓẓedmat i gan deg leɣwabi yezgan deg Bgayet : Aɣbalu, Akeffadu, Adekkar, akked tiẓgi yessufuɣen ɣer Jijel. Lɛesker n Lezzayer (ANP) tettɛassa tamnaḍt-a, tẓeddem ɣef yirebraben mi ara yili tḥeqqeq deg tedyant. Ayen yernan afud i lɛesker-nneɣ,; d lexbarat i asen-d-yettawḍen sɣur yimezdaɣ n temnaḍt-a. Timenɣiwt n 3 yirebraben deg temnaḍt n Ticci, ussan-a ineggura, ur d-tettili amer ur ten-znizen ara yimezdaɣ.
D. I.