Deg ukemmel n leqdic n tddukkliwin tidelsanin deg waɣir n Wehran, tiddukkla Imeɣri amecṭuḥ (Le petit lecteur), tqeddec war aḥbas. Dɣa deg yimalas-a, d taẓrigt tis kraḍet n tfaska n tmucuha i d-yezzin, akken i tennum tettheggi-tt-id yal aseggas.
Yella-d leqdic ɣef teɣzi n ukkuẓ n wussan, seg wass n sed 22 ar aram 25 yunyu 2019. Ass-nni n ssebt i yebda leqdic seg Uxxam n tddukkla Numidya i yekkin s tallelt.
Dɣa yesnubget-d uɛeggal n tddukkla-a, anmazul n uselway, Mass Akli Weɛmara d snat n tlawin, Massa Paule Latore seg tmurt n Fransa, d Naɛima Mehailia seg Lezzayer, i d-yulsen timucuha s tefransist d taɛrabt. Ma d Akli seg tama-s, yessawel-d s teqbaylit tamacahut “Aɛudiw n baba merǧan”, i d-yewwin ɣef userdun n ugellid d tlata yessi-s d warraw-nsent, d temsizzelt i asen-yexdem, d wanwa iwumi ara d-yeǧǧ aserdun. S usmuzget s tmeẓẓuɣt n warrac imecṭaḥ i d-wwin yimawlan-nsen, arrac-a ḍefren tasiwelt n tmucuha s tumert.
Asmi tekfa tsiwelt n tmucuha, tella-d tegnit n usenɛet n leqdic n kra seg yiɛeggalen n tddukkla i iqeddcen di tsusmi. D timucuha i d-yeffɣen d idlisen s wunuɣen yehhuskin d yiwen uḍebsi ussid i d-yeddan daxel i tmesliwt, am tmacahut “Tuɛwijt n yiḍarren, taxerrabt n lewḥuc”. Leqdic-a, sɛeddan-t-id deg tiliẓri tameqqrant i iɛellqen deg wammas n tzeqqa.
D tagnit ladɣa i warrac-a akken ad ṭṭfen di teqbaylit-nsen, daɣen d asekfel n leqdic n tddukkla sɣur snat n tnebgiwin i d-yerzan s lferḥ. Ar taggara, nesteqsa imsuddes n tedwilt Akli, yenna-aɣ-d: “Tamacahut d yiwet n tarrayt n usedhu d uselmed d urebbi n yimecṭaḥ, anida ula deg tmura yuẓan am Marikan d Lalman, tamacahut teṭṭef adeg s wazal-is deg tmetti. Ɣef waya, yal mi ara tettunefk tegnit, nxeddem-d leqdicat ɣef tmucuha deg tddukkla”.
D asmekti kan, imi ur ḥḍiren ara yinelmaden yeqqaren tamaziɣt deg uɣerbaz akken i nnumen deg sin n yiseggasen yezrin, anda i ḥeḍren i teswiɛin-a s tedwast (intention), acku imir-a deg yimuras i ten-yuɣ lḥal.
Khaled Achoui.