Gar-aɣ d kra n wagguren kan ad d-yeffeɣ umaynut n tcennayt tameqqrantYasmina. Deg album-agi ajdid, ad ilint azal n 12 n tezlatin i tessekles yakan. Am wakken i tuɣ tannumi tcennayt tettawi-d ugar n yisental ɣef lehmum n ddunit d wayen yeḍran yid-s, ula d tikkelt-a, ur tunif ara i lɛadda-agi-ines. Gar tezlatin i tura ɣef tmeddurt-is d wayen i tt-yerḥan, ad naf : Ucmiten, Ifat lḥal, Lḥiɣ di leɛmer, Axxam n waḍu, Tilufa, Ini-as i yemma. Deg umaynut-agi n ccna n tnaẓurt-agi taqbaylit, ddeqs n tejmilin i terra i yimdanen i yellan deg wul-is, yecban, Jida-as, Kheloui Lounes d JSK. Ula d tameddurt-is, teɛreḍ ad as-d-teg agzul deg yiwet n tezlit iwumi tefka isem «Taddart-iw». D asmekti n wayen tesɛedda deg ddunit-is : seg wasmi tella meẓẓiyet armi tunag ɣer Fransa. Tebda aktayen-is seg Ugni n Uɛayed anda yella lǧameɛ i yebnan s uẓru. Syin, teṣṣaweḍ slam i warrac n Yizarugen tenna : «ɛeddi ɣur-sen, huzz afriwen, deg yigenni zzi, afeg ɛelli. Siwel-asen i warrac n Yizarugen, d tiɣri n temẓi i d-yesmektan Zaɛzi». Dinna i d-temmekta aṭas n tɣawsiwin. Temmekta-d abeḥri n tɣaltin, ajenjel timrict, Tala n Tzeɣwin anda tedduri timidkin imi tewḥec deg ṭṭlam. Temmekta-d ula d asmi i tettbedda ɣef yimnaren n yixxamen mi tessutur leɣbar i txeddem d ticcict. ‘’I telḥiḍ ay aḍar, adrar aẓaɣar, teṣɛeb ddunit. Asusi, d uḥemmer, asewwi, aseqcer, semman-iyi tuḥrict». i d-tenna deg wawal-is. Tecfa am zun d iḍelli ɣef wayen i as-yeḍran, i wayen tesɛedda. Tecfa ɣef umezzir i d-tekkes, ɣef ulemsir iɣef teqqim, ɣef gerninuc i tečča. Tecfa ula ɣef lbir-nni anda i d-tugem aman deg Tgemmunt n Ukerruc. Wamag ɣef wasmi i tettruḥu ɣer uɣebaz, tules-as-d s teɣzi akked tehri, d tajmilt ahat i temddakkalt-is Saliha, teqqar : «Akken i neddukul d Saliḥa ɣer lakkul. Abrid Umegdul, yusa-yi-d ɣef wul, amzun d iḍelli. S rrekba n uɣyul, ttawiɣ lemtul, s sḍa d cnawi. Dagi mi d-nlul, amennuɣ iḍul, ay Iɣil n Yifri». Deg taggara, tudder-d s usḥissef uguren i tt-yeǧgân tunag ɣer lɣerba, ad teǧǧ tamurt-is mebla lebɣi. «Ay abuneqqar, i yi-yentan deg uḍar, di tegrest n Tulmut d Lḥedd n Sliman. Aslen deg ucekkar, aqejmur iqedder, anwa ara irun fell-i, ɛebbi rnu kan. Grirbeɣ deg yiɣzer, uliɣ asawen meqqer, ḥedd ma tɣiḍeɣ, luleɣ-d di lemḥan. Cerkeɣ lebḥar, abrid-iw yenǧer, ruḥeɣ ǧǧiɣ-ken, d lɣerba i yi-yeččan». Terra tezlit-agi d asaru ameẓẓyan (Clip) ara d-yeffɣen sya d afella.
Hocine Moula