Ass-nni n ssebt, 06 deg waggur n tuber 2019, i tella tezrigt tis ukkuẓet n Rreḥba n tgemmi tadelsant tamensayt deg Uxxam n yidles Mulud Mɛemmri n Tizi Uzzu, i yeddan armi d ass n ttlata, 8 tuber 2019. Tazrigt n useggas-agi, tella-d s usentel-a “Tajmaɛt, d azamul n wassaɣen gar yimezdaɣ n tuddar”, gan-tt tikkelt-agi d tajmilt i Mass Chami Mohamed d Massa Djama Khadija. Yebda ttiɛad-agi adelsan, s wudem unṣib ass-nni amezwaru ɣef 10h n ṣṣbaḥ deg Uxxam n yidles Mulud Mɛemmeri. Mbeɛd tulya tunṣibt, tella-d tirza n usefqed ɣer temsikniyin yellan i lmend n ummugar-a.
Syin akkin, tella-d tejmilt s wazal-is i Khadija Djama d Mohamed Chami deg tmeddit n wass. Ikemmel wahil ass-nni n letnayen 07 tuber 2019, ideg i d-yella tasebḥit usarag ɣef usentel n rreḥba-agi. Ɣef 10h00 n ssbeḥ, i d-nnejmaɛen rebɛa-agi n yimnadiyen; Boukhlef Farid, d anmezray u d amnadi deg wammas n unadi deg tutlayt d yidles amaziɣ n Bgayet, i d-yemmeslayen ɣef ɣef usentel-agi: “Tajmaɛt di tmurt n leqbayel, amezruy n tuddsa n tmetti”. Massa Lynda Ouatah, d taselmadt d tamnadit deg ugezdu n tutlayt d yidles amaziɣ n tesdawit n Abderrahmane Mira, i d-yemmeslayen deg teywelt-is ɣef wazal n wawal deg tejmaɛt. Ma d Mass Takheroubt Slimane, d amnadi d aselmad deg tesdawit n Tizi Uzzu, yehḍer-d ɣef wazal imetti-adelsan n tejmaɛt deg tuddsa n tmetti taqbaylit.
Ma d Massa Laihem Zineb, si tesdawit n Bgayet, tewwi-d awal ɣef wazal n tejmaɛt deg tuddsa tamatut n tmurt n leqbayel. Am wakken diɣ i d-tella tsiwelt n tmacahut i warrac imecṭah, sɣur Djamila Boughanem. Ma d ass-nni n ttlata, 8 tuber 2019, tessuli rrehba-agi s tirza ɣer taddart n Ḥura di Buzgan, i wakken ad d-siknen i medden amek i d-tettili tejmaɛt n taddart. Ad d-nesmekti kan belli, ɣef teɣzi n tlata wussan-nni-agi, llant-d waṭas n temsikniyin, yecban: lxedma n usɣar, azeṭṭa, talaɣt, lfeṭṭa, tameẓla (la forge)… Am wakken daɣen i d-llant temsikniyin n yidlisen, sɣur kra n tezrigin n yidlisen, tamkerḍit n Uxxam n yidles Mulud Mɛemmri, tamkerḍit tagejdant n tɣuri taɣerfant, Ulmis aɣelnaw n unadi deg tallit n uqbel amezruy d tin n umezruy (CNRPH), akked usenzi s ubuddu n udlis n kra n yimura.
Cwiṭ seg tmeddurt wid iwumi tuɣal tejmilt
Chami Mohamed, d mmi-s n taddart n Tewrirt Mimun, deg lɛract n At Yanni. Segmi meẓẓi netta yettḥarab ɣef tgemmi tamaziɣt s uḥraz n wayen icudden akk ɣur-s. Yejmeɛ ugar n 1 000 n tkasiḍin d 500 n tesfifin tiqdimin (78, 33 d 45 tours). Ɣur-s ugar n 6 000 n yimagraden n tɣamsa d wayen din n yiḍebsiyen yettwaskelsen, icennayen iqburen. Yettɛawan aṭas inelmaden yettnadin deg taɣult n tgemmi n uẓawan azzayri, ladɣa amaziɣ. Ma d Djama Khadidja, yelli-s n taddart n Lǧemɛa Nn Ssariǧ, tlul ass n 15 maggu 1964, di Lmarru, imi yemma-s d tamerrukit. Tesɛa agerdas n turagt deg tsusyulujit syin d agerdas n Master di taɣult-agi. Texdem acḥal d aseggas deg rradyu tis tlata, teffeɣ ɣer tasaɣt deg useggas-agi n 2019.
Adaoun Abdelghani