I lmend n usileɣ i d-thegga tddukkla Tiɣri n ugrud n waɣir n Bgayet, tekki tddukkla “Oxy-jeunes” s uselway-is, Mass Xaled Fuḍil akked tselwayt n tseqqamut n tigawt takulujit tasegmant. Yella-d usileɣ-a seg 19 ar 20 yebrir iɛeddan, ɣef wayen yerzan tigawin i icudden ɣer tmetti d yidles akked umussu asdukklan s umata. Tga-t-id usileɣ-a, Massa Nur Kawter Huda. «D akud igerrzen n tmussni, n ulmad, n beṭṭu d tegnit n tegmat (…).
Yella d tadfi d tageɛmirt uzday n usileɣ-a n yimekfaḍuyen akked yimeddukkal isegbaren isdukklanen», i d-yura uselway n tddukkla, Mass Xaled Fuḍil. Daɣen, tesnemmir tddukkla “Oxy-jeunes” n Yiderginen tamsileɣt d wid yekkin deg usileɣ, am wakken tessayaz (tetthenni) tidukkla timheggit Taɣect n ugrud n Bgayet.
Tettnebbih ɣef temḍerrit n twennaḍt
Si tama-nniḍen, tettnebbih tdukkla “Oxy-jeunes” n Yiderginen ɣef twaɣit takulujit i d-ibanen di tɣiwant-nsen, i yerzan agudu azayez. Ɣef wawal n yiɛeggalen n tdukkla-a, ilaq amuqel deg taluft n ugudu-a n lexla, i yellan deg yimi n taddart n Yiderginen, deg ubrid aɣelnaw wis 09. Imi kra n yimitren kan tama-s, tella din yiwet n tala ansi i tessen yimezdaɣ, aṭas i yebɣan ad yettwakkes ugudu-a, ad yeḥbes dayen uḍegger deg-s. Daɣen, imi teqreb ɣer udrum n Gar Isaffen, llan azal n 300 n lmitrat kan sɣur-s ar tmiṭ n tɣiwant.
Yettenḍeggar uhicur n ugudu-a deg teẓgi akked wasif Ageryun. Rnu-as asreɣ i d-yettilin dinna yal ass. Degmi yella ukukru ad d-derɛen amdan kra n waṭṭanen, ama s ubrid n waman neɣ n nnfu. Ugar n waya, yettwassen umḍiq-a ula s yibkan, i yellan gar yiɣersiwen yettwaḥudden. D aya i yeǧǧan ihi iɛeggalen n tddukkla “Oxy-jeunes” ssawalen i wid terza taluft, ad gen kra lawan-a ideg i d-tettqarab tsemhuyt n umerreḥ.
M. K.