Tettidir tɣiwat n Leɛǧiba deg wussan-a ineggura deg yiwet n liḥala n usbak n lecɣal. Aya, yebda-d yakan seg temlilit n yiɛeggalen n usqamu aɣerfan i d-yellan deg wass n 7 si meɣres ideg i nella. Ass-nni dɣa, tanabat n yiwen n seg yiɛeggalen-a yeǧǧa aselway n tɣiwant yesseḥbes timlilit urɛad i tekfi. Lexmis-a yezrin, iɛawed yeḍra-d unejmuɛ nniḍen, imi llan akk wid i teɛnat temsalt. D acu kan, uqbel beddu n lecɣal, win akken ur d-nusi ara di temlilit tamezwarut, ibeggen-d lɣiḍ-is mi yessuter deg uselway n tɣiwant ad t-yerr seg wid ara yilin d unṣib di tɣiwant am akken yella lḥal d yimeddukkal-is. D ayen ur yezmir uselway ad t-yexdem deg yimir skud ur id-yekki ara rray n lwali n Tubiret. Aya, yesserfa aɛeggal-a yegguman ad yekki deg ufran ɣef yisental yettwaheggan. D ayen ihi yeǧǧan yal mi ara d-yessuter uselway rray n wid iḥeḍren, ad d-teffeɣ 7 n leswat n uqbal, 7 nniḍen ur qbilen ara. Ta, d yiwet n liḥala ara yeǧǧen isenfaren ur teddun ara, ma yella teqqim kan akka ur d-telli ara kra n tifrat. Ɣef leḥsab n yisallen i aɣ-d-yewḍen, aɛeggalen-a yellan deffir uneḥbus-a n lecɣal d win akken yellan ɣer tama n lmir yellan akka, maca asmi i iwala ala netta gar xemsa n wid i d-yufraren deg lejrida ideg yella llan akk deg tɣiwant, yessuter ula d netta azref-is ad yili d aɛeggal unṣib.
S. M.