Ilmend n wass agraɣlan n useklu, imḍebbren n tẓegwa n M’chedallah s lemɛana n tiduukla « azal » d tɣiwant n temdint-a xedmen yiwet n twizi s wazal-is. Azal n sin n yigima n yisekla i d-yettwaheggan i wuẓu-nsen deg yimukan yemgaraden. Imi, rray d win i iɛeǧben i yimezdaɣ i merra, timsulta n temdint-a d yiɣallen n usellek gren-d ifassen-nsen di cɣel-a iwakken ad cebḥen tawennaḍt yewwḍen ɣer yiwet n liḥala ur tuklal ara. Di tsebḥit n wass n lexmis, abrid n temdint tamaynut yettucebbeḥ s 179 n yisekla ara t-yerren deg yiseggasen d-iteddun d amedya n twennaḍt tazedyant. Annar n tɣiwant, ula d netta ur yuɣal ara di rrif, imi 47 n yisekla i ttwaẓzun deg-s, rnu 47 nniḍen deg uɣerbaz alemmas n At Yexlek, imi mačči aṭas aya i yeldi tiwwura-s. Ula d timeqbert tewwi azal-is n yisekla, imi imḍebbren n twizi-a walan dakken d amkan yeḥwaǧen tizzegzewt, d ayen i ten-yeǧǧan ssawḍen-as azal n 550 n yisekla. Ɣef leḥsab n yimeslayen n yimḍebber n tẓegwa di M’chedallah, « tiduukliwin i yebɣan ad ẓẓunt deg yimukan ilaqen zemrent ad d-ssutrent ayen iwulmen n yisekla. Tamehla-nneɣ tewjed iwakken ad d-terr i teɣri, ilaq kan uẓu ad yili deg yimukan yesɛan ttawilat yecban aman iwakken ar ttɣaren ara yisekla ».
S. M