I lmend n usmekti s umulli wis 13 n tmenɣiwt n uselway aqbur n Useqqamu aɣerfan n lwilaya n Tizi Uzzu, Mass Rabah Aissat, yettwanɣan deg 12 seg waggur n tubeṛ n useggas 2006, deg lqahwa, sdat n yimddukkal-is ukud yetturar deg taddart-is deg Ɛin Zawya, tuɣal-as yiwet n tejmilt meqqren, sɣur imeɣnasen n ukabar n Terni n yiɣallen nemlayen (FFS), tawacult d yimeddukkal-is. Tella-d tejmilt ass-nni n sed, 12 deg tuber iɛeddan, deg taddart-is deg Ɛin Zawya, dayra n Draa El Mizan, i ibeɛden s 40 n yikulimitren ɣef unẓul n temdint n Tizi Uzzu. Deg tazwara, yella-d usersi n tmeqqunt n yijeǧǧigen ɣef uẓekka n umerḥum, anda teḥḍer twacult n umeɣnas, iɛeggalen n Useqqamu aɣerfan n lwilaya n Tizi-Uzzu, iɛeggalen n Useqqamu aɣerfan n tɣiwant n Ɛin Zawya, imeɣnasen n Ukabar n Tirni n yiɣallen Inemlayen ( FFS) d imeddukkal-is.
Deg wawal i as-yettunefken i uselway n Useqqamu aɣerfan n lwilaya n Tizi Uzzu, Mass Youcef Aouchiche, deg tejmilt-agi, yewwi-t-id ɣef umahil n Mass Aissat i yellan d amedya i yimezdaɣ n ugezdu. Aṭas i refdent tsutiwin n yimeɣnasen seg umahil-is, ɣas ma yemmut. » Dda Rabah d amatar, d ameɣnas amudam. 13 n yiseggasen seld timenɣiwt-ines s yifassen n leɣder, mazal yettmalaɣ abrid yelhan, s tenfut-is meqqren. Yella d amdan lɛali, yettmuddun afus n tallelt i yimdanen n lwilaya”, i yenna Mass Youcef Aouchiche i d-iwekkden i tikkelt-nniden s lebɣi-is ɣef unadi n tegnatin n tmenɣiwt-is. Dima ɣef Leḥsab n uselway n Useqqamu aɣerfan n lwilaya n Tizi Uzzu, ha-t-an yella lebɣi i wakken ad d-tili tukci n yisem n umeɣnas Rabah Aissat i tesnawit n Ɛin Zawiya deg wussan i d-teddun.
» Ass-agi, bɣiɣ ad d-ḅerḥeɣ d akken xeddmen yakk ayen iwatan akken ad semmin tasnawit n Ɛin Zawya s yisem n Rabah Aissat, aya, ad d-yili dɣa deg ddurt i d-yetdun. » Dɣa deg useggas n 2017, yella-d lebni n usmektay ɣef ccfaya n umeɣmas deg tɣiwant n Ɛin Zawiya. Rnu ɣef waya, isem n umeɣras n tugdut, yettunefk i temsizzelt n warraz n taddart tazedgant deg ugezdu, i d-yessuter ad-tili ass-mi yella yedder.
S kra seg umahil n Rabah Aissat
Yella Rabaḥ Aissat, d aselway n Useqqamu aɣerfan n tɣiwant n Ɛin Zawiya seg useggas n 1997 armi d aseggas n 2002. Syin, yettwaffren d aselway n Useqqamu aɣerfan n lwilaya n Tizi Uzzu deg useggas n 2002 anda yettuɛawed i tikkelt-nniḍen deg useggas n 2005.
Yettwanɣa ass n, 12 deg waggur n tubeṛ 2006, lewhi n tmeddit, deg waggur n Remḍan, seg yiwet n terbaɛt yettwaselḥen, ɣef tabla n duminu, sdat n yimeddukkal-is ukud yetturar, deg taddart-is. Seg yimir, yezga yessutur ukabar Tirni n yiɣallen inemlayen tasastant ɣef tmenɣiwt tamsertit n umeɣnas-agi n tugdut.
Ali Zalouk