I lmend n usmekti n umulli wis 63 n tlalit n umedyaz d ucennay neɣ anaẓur aqbayli amḥaddi Lwennas Matub, ttwaheggan waṭas n leqdicat ussnanen, idelsanen, inaddalen…atg.
Yal tama amek i d as-terra tajmilt, yal aseddu anwa amkan i yefren i wakken ad d-yesmekti amulli n tlalit n ucennay izedɣen ulawen n yimaziɣen merra. Zyada ɣef temlilit tussnant taɣelnawt, i d-yellan ussan n 23 d 24 yennayer 2019 deg tesdawit n Mulud Mɛemmeri n Tizi Uzzu, llan-d daɣen leqdicat-nniḍen deg tamiwin-nniḍen.
Ahil n tesbeddit
Matub Lwennas
Tessuddes-d Tesbeddit Matub Lwennas ddurt tadelsant i lmend n umulli-agi wis 63 n uɣewway yewwin isem-is. D leqdic adelsan, i d-yellan ɣef teɣzi n tlata wussan-agi, 22, 23 d 24 yennayer 2019, ama deg Uxxam n yidles Mulud Mɛemmeri, ama deg usɣim (siége) n tesbeddit-agi. Dɣa, deg wass amezwaru n leqdic-agi, i d-yellan ass-nni n ttlata 22 yennayer 2019 deg Uxxam n yidles Mulud Mɛemmeri, yebda wahil ɣef 9h00, s waṭas n temsikniyin ɣef tudert d umecwar n ucennay-agi, ɣef leqdicat daɣen n tesbeddit-agi Matub Lwennas. Ma ɣef 14h00 n tmeddit, yella-d usarag sɣur taselwayt n tesbeddit-agi Malika Matub, i d-yewwin awal ɣef usentel-agi “Tamaɣant (bilan) n 20 n yiseggasen ɣef tlalit n tesbeddit-agi: Ayen uɣur tessaweḍ d wayen i tt-yettraǧun”. Anda i d-temmeslay ɣef yisenfaren yettraǧun tasbeddit-agi, d wayen texdem deg snat n tɛecratin-agi iɛeddan (20 n yiseggasen). Ikemmel daɣen leqdic dinna, azekka-nni n larebɛa 23 yennayer 2019, anda i kemmlent temsikniyin-nni n yiḍelli-nni, yella-d diɣ usersi n tmeqqunin n yijeǧǧigen ɣef yiẓekwan n yiɛeggalen yemmuten, i d-isbedden tisbeddit-agi Matub Lwennas. Ma d ass-nni n lexmis 24 yennayer 2019, yella-d usersi n tmeqqunin n yijeǧǧigen ɣef uẓekka n uɣewway sɣur yiɛeggalen n tesbeddit yewwin isem-is. Am wakken daɣen i d-yella usersi n tmeqqunin-nniḍen deg umḍiq anda yettwanɣa deg Tala Bunan. Ma deg tmeddit n wass, yella-d ufraq n 4 n warrazen i ukkuẓet n twaculin i d-yefkan iɛeggalen i d-isbedden tasbeddit-agi, i yewwḍen leɛfu Rebbi. Annect-agi merra, yella-d deg usɣim n tesbeddit-agi, deg taddart n Tewrirt Mussa Waɛmer deg Wat Meḥmud.
Tazrigt tis 3 n temsizwert Matub Lwennas n waddal
Timsizwert n waddal n ddabex uḍar Matub Lwennas, i d-ssuddusen yimḍebbren n waddal yal aseggas i usfugel tlalit n umerḥum acennay akked umedyaz, teḍra-d ass-nni n ssebt 26 yennayer 2019, deg tzeqqa tagtaddalant n OPOW n Tizi Uzzu, s yiwen n wahil anesbaɣur i d-heggan yimsuddsen n leqdic-a anaddal. Tella-d tezrigt-agi tis kraḍet n temsizwert-agi, i lmend n umulli wis 63 ɣef tlalit n ucennay Matub Lwennas, i ilulen ass n 24 yennayer 1956.
Dɣa i lmend n waya, ha-t-an wayen i d-yellan ɣef teɣzi n wass. Ɣef 11h00, yella-d uqabel n yinebgawen i d-yerzan, syin akkin, yella-d imekli i yiseɣ n yinebgawen, i d-yerran i tiɣri. Ma ɣef 13h30, tella-d teldayt tunṣibt n temsizwert-agi. Deg tmeddit n wass, llant-d kraḍet n temliliyin n ddabex uḍar, gar yimuraren iqburen yellan d itran n trebbuyaɛ-agi: JSK, MCO, USMH, CAB, MSPB akked yigraɣlanen iqburen. Ma d ahil n temliliyin, yella-d akka : Ɣef 14h00 n tmeddit, teḍra-d temlilit tamezwarut gar yimuraren iqburen n snat-agi n trebbuyeɛ n Tbatent CAB d MSPB. Ma d timilit tis snat, i d-yellan ɣef 15h00, tejmeɛ-d gar yimuraren iqburen n USM n Lḥerrac d wid MC n Wehran. Timlilit taneggarut, tella-d ɣef 16h15, gar yimuraren igraɣlanen iqburen d yiqburen n Terbeɛt n Yilmeẓyen n Leqbayel (JSK). Aṭas n wudmawen inaddalen akked yisertanen, akked yiduba idiganen, i iḥedren timsizwert-agi n waddal, i d-yellan d tajmilt i ucennay Matub Lwennas, i yellan iḥemmel aṭas tarbeɛt n JSK, i yecnan ayen din n tezlatin fell-as.
Gh. A.