Deg yiseggasen-a ineggura, ṭṭfent tkebbaniyin tibeṛṛaniyin amḍiq ameqqṛan n uxeddim di tmurt n Lezzayer. Ladɣa tigad n Ṭṭurk akked d tid n Ccinwa. Am tkebbanit n CRCC i yeṭṭfen asenfaṛ n ubrid amazzal (autoroute) i yellan gar Lezzayer tamaneɣt, yettuṛaǧu ad yettwakemmel armi d Bgayet. Ass n ahad 24 di yennayer yezrin, yiwen n uxeddam seg termist-a, i yesεan azal n 45 n yiseggasen, yeḥṣel deg wasif Asemmam ( Ssumam ), deg umḍiq iwumu qqaṛen Agemmaḍ, taɣiwant n At Leflay di tdayṛa n Sidi Ɛic.
Imi yella inehher yiwet n tmacint, itekkes iεewwiqen yellan deg umḍiq-nni i wakken ad sεeddin syinna abrid. Ɣef leḥsab n yiqeddacen n Uḥuddu aɣarim, teḍra temsalt-a ɣef wazal n 02:25 n tnezzayt.
D ayen i ten-yeǧǧan, gren iman-nsen i wakken ad fken afus n tallelt, ad d-sselken anehhaṛ-a. Ama s yimenṭaben ( plongeurs ), neɣ s yikamyunen n unekcum, s lemεawna n termiṣt n CRCC. Seld ugar n sin n yisragen, ṣṣawḍen selken-t-id. Imḍebber n terbaεt n usellek n Uḥeddu aɣarim, yessawel imir-n i unemhal n twilayt n Bgayet, i yessawlen s nnuba-s i Lwali.
K. K.