Sendiḍelli n ssebt n, 21 duǧamber 2019, i yebda leqdic adelsan i d-yettwaheggan i lmend n yimuras n tegrest iɣurbizen, ama deg Uxxam n yidles Mulud At Mεemmer n Tizi Uzzu, ama deg tneḍfart-is n Azazga. D ttiεad-agi adelsan, deg tezrigt-is tis rebɛa, ara ad yilin i lfayda n warrac imeẓyanen, alamma d 30 deg waggur-agi n duğamber ideg nella. D tagnit ideg ara faṛsen yilmeẓyen imuras-nsen n ccetwa, yerna ad sgunfun cwiṭ seg ulmud mebɛed akraḍyur n leqraya. Dɣa deg wahil n Uxxam n yidles Mulud Mɛemmeri n Tizi Uzzu, ttilint-d temsikniyin-a n yidlisen n yigerdan, yal ass seg 09h00 alamma d 16h00 n tmeddit.
Am wakken diɣ i d-ttilin yisenza s yibudan n yidlisen n warrac ɣef teɣzi n ddurt-a tadelsant. Ass-nni n ssebt iɛeddan, yella-d usiher n tulya n tezrigt-agi tamaynut n yimuras sɣur yimseḍṣi “Kimous d Kouki” sɣur Youcef akked Ibrahim. Syin akkin d ashier i d-tewwi tddukkla tadelsant “Tiɣilt-nneɣ”. I yiḍelli n lḥed 22/12/2019, yella-d usikew n useɣmi (coloriage) seg 10h00 ar 12h00. Syin akin seg 14h armi d 16h00 deg tzeqqa n umezgun, yella-d usiher n tddukkla tadelsant Ibturen. Ma d ass-agi n letnayen 23/12/2019, tasebḥit, ad d-ilin aṭas n leqdicat idelsanen sɣur tddukkla tussnant Itran. Am wakken diɣen ara d-yili ɣer tmeddit usiher n yimseḍsi Moumou et Mimi.
Ma seg wass-a ɣer wass n letnayen i d-iteddun, aṭas n leqdicat-nniḍen ara d-yilin gar tmeɣra n ugraw Amaḍal Kids, timezgunin, asarag ɣef yigerdan, d yisikwan (asuneɣ, tira…atg). Deg tneḍfart n Uxxam n Yidles, yellan di Azazga, ad yebdu wahil azekka alamma d ass n letnayen 30/12/2019. Azekka n ttlata 24/12/2019, deg umḍiq n yisikwan, ad d-yili usikew n tira, asuneɣ d useɣmi ɣer tama n usarag ɣef yinelmaden, am wakken daɣen ara d-tili tegnit n usenzi s ubuddu n udlis “Uccen d umeksa” n Kamel n Bentaha. Am wakken daɣen ara d-ilin ddeqs n yirmad-nniḍen ɣef teɣzi n ddurt-a d tazwra n ddurt i d-iteddun, gar-asen: isikwan n yimahilen n ufus, asuneɣ, timucuha akked tmeɣra n ccna d ugraw Amaḍal Kids…atg.
… Ula deg Xeṛṛaṭa
Seld akṛaḍyur n uxeddim, d leḥṛiṣ ɣef warrac, telḥeq-d teswiεt n usgunfu i yeḥwaǧen nezzeh. Ladɣa wid n uswir amenzu, imi nutni mazal-iten meẓẓiyit. Rnu ɣer waya, ahil n leqṛaya-nsen i iweɛren fell-asen. Acku, seg yiwet n tama, yeččuṛ mliḥ, seg tama-nniḍen, ulac deg-s ayen ara yessixfifen ɣef uqcic εeggu. Ass n 19 duǧember yezrin, yemxalaf ɣef wid yezrin ɣur yinelmaden imecṭaḥ. Ayagi yettban deg wudmawen-nsen, dɣa umren ayendin, imi yewweḍ-d lawan ad as-fken i turart azref-is. D tidet, yal yiwen amek ara yesεeddi imuṛas-is. Lameεna tella temsalt i ten-icerken, ad kksen ɣef wulawen-nsen akken ma llan. Ɣef waya dɣa i d-lhan yimḍebbṛen n tɣiwant n Xeṛṛaṭa d warrac-nsen, d wamek ara sɛeddin imuṛas imi i asen-heggan ahil d ameṛkanti. Ayagi ad yili deg Tzeqqa n umezgun 8 mayu 1945.
Ddeqs n tceqqufin n umezgun i d-heggan i ttiεad-a. Ad d-nesmekti d akken, isental n tceqqufin-a, ad d-yernun, melba ccekk, tamussni i warrac. Am wakken ara tili daɣen, turart n tuffra akked yiseḥḥaren. I yisalli, ahil ad d-yebdu ass n 20 duǧember alamma d ass n 27 deg wayyur-a. Ihi d tagnit i win yebɣan ad ifaṛes asteεfu, d tmussni deg yiwen n ttiεad. Arrac d yimawlan-nsen, umren mliḥ s ccɣel-a, ɣef usentel-a yenna-aɣ-d yiwen n ubabat: « Arraw-iw, wwin-d igemmaḍ igerrzen deg yikayaden-nsen, lliɣ ttxemmimeɣ anda ara ten-awiɣ deg yimuṛaṣ-a. Tura imi i aɣ-d-xedmen timliliyin-a, ad ferneɣ kra n wussan, ad ten-awiɣ. Acku d ayen yelhan mliḥ, imi rnu i tmussni ara d-awin, d tagnit i wakken ad myussanen d warrac-nniḍen ». Ikemmel deg wawal-is yenna-d : « Ssarameɣ akk imawlan, ad d-rren s lexbar s ubaɣuṛ n temlilin-a i warraw-nsen ».
GH. A. / K. K.