Llan-d di tmurt n Qaṭar, si 27 cutember ɣer 6 tuber, wuraren imaḍalanen n tatlitit (athlétisme). Din dɣa i d-iḥerra mmi-s n Suq Ahras, Tufiq Mexlufi, tazibba n uẓref imi i d-yezga deg umḍiq wis sin deg tazzla n 1 500 n yimitren, deffir n ukinyan Timothy Cheruyiot. Send ad yaweḍ ɣer taggara, yella yerna yakan deg tazzliwin i d-yusan send. Ilaq ad d-nini d akken uraren-a i yemmuggen di Qaṭar, ur sferḥen ara ddeqs n yinaddalen, am wakken yekker fell-asen yir awal deg tɣamsa n tmura. Aṭas n wid i d-ibeggnen urrif-nsen seg tegnatin iweɛren ideg i d-tettwahegga teẓrigt-a.
Dɣa, ayen iɣef ccektan yinaddalen d lḥal n tegnaw yeḥman i ufan di tmurt-a akked telmawit (tefreɣ) n wannaren ideg tturaren. Seg lḥamu i yellan dinna, ugar n 20 n yinaddalen i yeffɣen seg umaraṭun, ur sawḍen ad as-kemmlen. Ɣas tuget n wuraren, ḍerrun-d deg unnar Khalifa Stadium, iwumi temmug tesmuḍi armi d 25°, wanag di berra tezmer ad taweḍ armi d 40° n tfesniwin. Ma yella d imferrǧen, ɣas ma caḍen cwiṭ deg wass amezwaru n teldayt, i iɛeddan s wudem yelhan, maca drusit maḍi deg wussan-nniḍen armi d-ttbanent tseddarin n unnar d tilmawin, ulac akk lɣaci. Akken i d-nnan kra, ur muqlen ara yimheggiyen i ubaɣur n yinaddalen mi d-suddsen uraren-a di tmurt n Qaṭar. Rnu daɣen, akken yella waddad, ur zmiren ara ad xedmen igemmaḍ igerrzen deg taggayt-nsen n waddal. Seld tirmit-a, tettmesteqsay tɣamsa n umaḍal ɣef wamek ara iɛeddi uheggi n teqbuct n umaḍal n ddabex n uḍar, i yetturaǧun ad d-tili di tmurt n Qaṭar, deg useggas n 2022.
M. K.