Deg yiwen n ulɣu i d aɣ-d-yewwḍen seg Tmehla n Uḥuddu Aɣerman (Direction de la Protection Civile ) n waɣir n Bgayet ddurt iɛeddan, yedda-d yisalli n teldayt tunsibt n tsemhuyt n unebdu deg Bgayet, ass n 16 deg yunyu, sɣur lwali Mass Uld Saleḥ Zituni.
ɣas ma ddeqs-aya segmi bdan medden asefqed i teftisin imi lḥal yewwi-d aya. Tigawt-a d tin i d-yeḍran deg teftist n Uweqqas, deg Tala Xaled, sdat waṭas n yimḍebbren idiganen (locaux) akked ddeqs n medden. Akken nezmer ad nɣer deg ulɣu-nni, deg 34 n teftisin n twilayt anda yettuserreḥ uɛumu, iga-d Uḥuddu aɣerman akk ayen ilaqen, ama d irgazen neɣ d ttawilat, akken ad tɛeddi tsemhuyt n useggas-a deg tegnatin igerrzen. Ad d-nebder seg wallalen-a azal n 357 n yiɛessasen n teftisin, 65 n wid yettferrsen deg uɛumu, d imsellken isadaren (professionnels) n Uḥuddu aɣerman, rnu-as 25 n yiɣeṭṭasen isadaren. Ma yella d dduzan i d-yettwaheggan i usellek sɣur Tmehla-a i d-nebder, llan, gar waṭas-nniḍen, 10 n teflukin timecṭaḥ, tikerrusin n usellek, …atg. I usmekti daɣen, ad d-iheggi Uḥuddu aɣerman deg teɣzi n unebdu-a tabniqt (cellule) n uḥesses deg teftisin n waɣir akken ad sɛelmen lɣaci ɣef wayen ilaq ad xedmen imir mi ara d-teḍru twaɣit, ama deg yilel, deg tẓegwa, am undar n tmes, neɣ d isehwa (accidents) n ubrid. Am wakken ara ferqen tiferrawin i d-yessefhamen ugar ɣef yimihiyen (dangers) i d-yettasen seg yibaxixen-a.
Mhenni Khalifi