Ass-nni n larebɛa yezrin, 27 deg waggur n cutember 2017, i d-tefka tneɣlaft n Usegmi aɣelnaw Massa Nouria Benghabrit, deg tansa (le site) n tneɣlaft-is leğrida n yikayaden unṣiben n taggara n useggas-agi aɣurbiz 2017 / 2018. Ihi ha-ten-in amek ara d-asen: Akayad n taggara n uswir amenzu 5e, ad d-yili ass n larebɛa 23 deg waggur n maggu ( 28/05/2018). Ma d win n taggara n uswir n ulmud alemmas, yettwassnen s yisem n BEM, ad d-yili seg wass n letnayen 28 alamma d ass n larebɛa 30 seg waggur yunyu (28-29-30/05/2018). Ma d win n taggara n uswir n tesnawit neɣ ayen iwumi qqaren BAC, ad d-yili seg wass lḥed 03 yunyu alamma d ass lexmis 07 deg waggur n yunyu (03-04-05-06-07/06/2018). Ma akayad n waddal ama d win BEM neɣ d win BAC, ad t-sεeddin yinelmaden deg yiɣerbazen-nsen am yiseggasen i iɛeddan. Akayad-a, ad d-yili gar tlemmast n waggur n meɣres d tazwara n waggur n yebrir n useggas i d-iteddun. Akayad n taggara n uswir amenzu 5e n useggas aɣurbiz 2017 / 2018, ad t-sεeddin yinelmaden deg yiɣerbazen-nsen anida qqaren, mebla ma rzan ɣer yiɣerbazen-nniḍen, am wakken xedmen deg sin n yiseggasen-agi yezrin. Ma nger tamawt ɣef leǧrida-agi n yikayaden n useggas-agi aɣurbiz amaynut, ur temgarad ara ɣef tin n useggas yezrin, imi ulamma ugin deg useggas-nni i iɛeddan ama d imawlan n yinelmaden neɣ d inelmaden s timmad-nsen ad sɛeddin ikayaden-agi unṣiben n taggara n useggas deg waggur n Remḍan, ladɣa win n BEM akked win n BAC, imi ɣef leḥsab-nsen ttenqasent tzemmar n yinelmaden yettuẓumen, ladɣa wid n lwilayat n unẓul n tmurt, anida tettaweḍ lḥamu ɣer 50 n tfesniwin, maca taneɣlaft n usegmi imi d nettat i d timḍebbart tamezwarut n uḥric-agi n usegmi, dɣa teṭṭef deg rray-is ur teẓẓuẓ ara ikayaden-agi ɣef waggur n Remḍan.
Ghani Amazigh