Amazday n ugezdu n tutlayt d yidles Amaziɣ n tesdawit Mulud Mɛemmri n Tizi Uzzu, heggan-d ass-nni n ttlata yezrin 28 unbir 2017, ɣef teɣzi n wass, asenzi s ubuddu n sin wammud n tmedyazt n sin n yimedyazen. Amezwaru d Mass Gamar Mbarek i d-yewwin adlis iwumi yefka azwel “99 d asefru”, ma d wis sin d Mass Maouchi Amar, i d-yewwin adlis iwumi isemma “Temẓi tawessart”. Yella-d wannect-agi deg temkerḍit n ugezdu n tutlayt d yidles amaziɣ n tesdawit-a. Am wakken daɣen i d-wwin awal ɣef sin-agi n yidlisen-nsen akked tmedyazt taqbaylit s umata.
Timsizzelt n tmedyazt akked ccna
Ddaw-tanmehla (sous-dirertion) n leqdicat ussnanen d yidelsanen akked yinaddalen n tesdawit n Tizi Uzzu, suddsen-d yiwet n temsizwert n tmedyazt i lmend n yisdawanen yeqqaren deg yigezda yemgaraden yellan deg tesdawit n Tizi Uzzu. D timsizzelt ideg ara d-ufranen 3 n yimedyazen isdawanen n tesdawit-agi. Ajerred yettili-d akka tura deg Ddaw-tanmehla (sous-dirertion) leqdicat ussnanen d yidelsanen akked yinaddalen n tesdawit, syin ad yili ufran n yisefra n yal agezdu sɣur unesɣammu (jury), syin akkin ad tili temsizzelt taneggarut ass n 19 maggu 2018, i lmend n wass aɣelnaw n usdawan. Wid yebɣan ad ttekkin deg temsizzelt-agi, ilaq ad jerden iman-nsen, yerna ad mudden sin n yisefra-nsen, d widak ara d-inin ass-nni n temsizwert taneggarut, ara d-yilin deg tzeqqa n yisaragen n tesdawit n Hasnaoua1. Am wakken daɣen ara d-tili temsizwert n ccna, i lfayda n yisdawanen iḥemmlen aẓawan. Yebda ujerred deg-s seg 15 unbir 2017 ad yeddu alamma d ass n 15 duǧamber 2017, deg Ddaw-tanmehla (sous-dirertion) leqdicat ussnanen d yidelsanen akked yinaddalen n tesdawit. Yal tasdawit, ad tefk sin n yisdawen-is ara yettekkin deg temsizzelt taɣelnawt n taggara ara d-yilin ass n 19 maggu 2017.
Adaoun Abdelghani