Mbaɛd asunded n yinelmaden i yeṭṭfen azal n 5 n ledwar deg Ugezdu n tutlayt d yidles amaziɣ anda ssuturen aseggem n tegnit ur ngarrez ara, ha-t-an ihi tuɣal-d ciṭ n tiɣri, ladɣa deg wayen yeɛnan abeddel n yimḍebbren.
Akka, dɣa, i d-yella ubeddel n Mass Betouche s Mass Imarazene ɣef uqerru n Uɣiwen n tutlayin (Faculté des lettres et des langues), akked Massa Sabri, i yellan d tanemhalt n ugezdu s Mass Haddad samir. Aya, yessefreḥ aṭas n yinelmaden imi, ɣef wakken i aɣ-it-id wekkden kra. ‘’ Wigi zemren ad d-awin amaynut, ama i ugezdu, i yinelmaden neɣ i tmaziɣt s umata’’. Nesteqsa Mass Haddad Samir, yenna-d : ‘’ Mi i d-yella usunded n yinelmaden ɣef leqraya anda sutturen akken ad ttwabeddlen yimḍebbren, ssawlen-aɣ-d i nekni akken ad nili deg umekkan-agi. Nekker-d deg Ugezdu d inelmaden, nuɣal d iselmaden, syin d imḍebbren. Aya, d aḥulfu yelhan. Yiwen wass daɣen, ad d-asen wiyaḍ akken ula d nutni ad xedmen deg uxxam-a, akka s nnuba. Ruḥeɣ-d ass-a akken ad nexdem. Ha-t-an send asunded-agi, aṭas n uxeddim i yellan, acku tuɣalin mbaɛd azal n sin wagguren d ayen iweɛren. Ma ɣef wayen ara yilin tamaynut, yenna-d: ’’ Ih d ayen ara d-yilin. Mbaɛd leɛḍil i d-yellan, ayadra aseggas aɣurbiz, ad yekfu yekfu di lawan ? Mi ara d-nuɣal seg yimuras, ha-t-an ad ilin ikayaden. Limer mačči d leɛḍil-a, tili d asdisyur-nniḍen ara nebdu, meɛna ad neɛreḍ akken ad nekfu di lawan. Ddurt tamezwarut mbaɛd imuras, ad nberreḥ ɣef uzemz n yikayaden, di taggara, ad iniɣ nessaram ad nexdem ayen ara d-yawin ayen yelhan i uxxam-agi-nneɣ, ad d-nawi ugar n tmussniwin, d ayen i yelhan i nebɣa ad nexdem. Mbaɛd abeddel-a, ihi, uɣalen yinelmaden ɣer leqraya.
Adaoun Abdelghani