Par DDK | 2 Juillet 2018 | 695 lecture(s)

At Dwala

Yeḍra-d Zenith n Matoub deg Tewrirt n Musa Waɛmer

I tikkelt tamezwarut i d-yeḍra waya deg tmurt n Lezzayer. Aseqqɛed n usekles aqdim s ttawilat n tura i wakken ad tuɣal tbidyut yemmundlen teṣfa 3D. Ihi, ass-nni n umulli wis 20 n tmettant n ucennay Matoub Lounes, 25 deg yunyu 2018, i d-yeḍra. Snaɛten yimsuddsen n usiher-a, Dzayer TV, ONCI akked Lsas Matoub Lounes tameɣra yexdem unaẓur deg tzeqqa n Zenith deg Fransa, deg useggas n 1995. Ssawḍen s ttawilat atraren i wakken ad d-ssidiren tignatin seg i yecna ucennay deg tallit-nni. Yexleḍ lferḥ d imeṭṭi i 5000 n yimdanen i d-yusan i wakken ad t-walin. ‘’Am wakken sdat-i i yettɣenni. Ad as-tiniḍ d tidet ha-t-an deg Tewrirt. Tanemmirt i wid akk i ixedmen lecɣal-agi. Ass-a, ḥyan-d Lwennas sdat-neɣ’’. Akka i d-yenna yiwen n yilemẓi. Ulugram-agi, yesmektay-d winna i as-xedmen i Michael Jackson deg Billboards Awards deg useggas n 2014. Syada ɣef wanect-a, ccnac aṭas n yicennayen ass-nni n 25 deg junyu deg Tewrirt n Musa Waɛmer, gar-asen Hacène Ahres, Baâziz, Agraw, d wiyaḍ. Ma ɣef yisenfaren ara yilin akka ɣer sdat, tenna-d Malika Matoub s yisem-is d taselwayt n Lsas Matoub Lounes : ‘’Aql-aɣ la d-nettheggi yiwen usenfar d ameqqran. Ad nexdem asalay akked uɣerbaz n uẓawan Matoub Lounes. Ha-t-an nemsefeham gar-aneɣ, yemma, tameṭṭut n Lwennas belli ayen akk yesɛa Matoub ad yuɣal dayla n Lsas yewwin isem-is. Aya, i wakken ur d-tettawi ara tama-nniḍen imi yebda-d niqal wawal sya u sya ɣef uxxam-is’’.
H.M.

0