Par DDK | 13 Aout 2018 | 538 lecture(s)

Lemṣella - Aheggi i tezrigt tis 11 n tmeɣra n tbexsisin

Ad tili gar 24 d 25 ɣuct-a

Ula d tameɣra n tbexsisin la d-yettqarab lawan-is, i yetturaǧun ad tili di taggara n waggur-agi. Acḥal-a, segmi yebda uheggi-ines sɣur yiɛeggalen n Tiddukkla “Tiɣilt” n taddart n Lemṣella. Aseggas-agi, ṣawḍen ɣer tezrigt tis mrawet d yiwet (11) n tmeɣra n tmexsisn, ara d-yilin ussan n 24 akked 25 ɣuct 2018, ddima deg taddart n Lemṣella, yettwassnen mliḥ s tneqlin. Imsuddsen n leqdic-agi, fernen tanfalit “Tibexsisin di tmeɣra, d afran igerrzen”, i wakken ad yili d asentel n tezrigt-agi tamaynut. Yetturaǧu deg tezrigt n useggas-a, ad yili wahil d anesbaɣur, ama si tama n yirmad idelsanen ama si tama n temsikniyin. Aṭas n yimsikniyen ara yilin di ttiɛad, gar-asen wid n tqendurt, wid n usɣar, wid n tamemt...atg, ara d-yerzun si tuddar-nniḍen ɣer tama n wat taddart-agi, ara d-isiknen leṣnaf n tbexsisin yemxalafen. Am wakken daɣen i yetturaǧu ad d-yili wawal s telqeyt deg yisaragen, ɣef yibaɣuren n lbexsis, iḥbuben neɣ tazart ɣef tezmert n umdan.Ttiɛad-agi, yettuneḥsab d tagnit i yimerriyen i wakken ad issinen taddart n Lemṣella i icebḥen aṭas. Am wakken daɣen ara d-walin ayen tekseb d agerruj, gar-asen leṣnaf yemxalafen n lexrif akked tazart d wayen akk i d-ittekken seg-sen. Di taggara, ad d-nini belli leqdic adelsan, ad yettwasuddes sɣur ddeqs n yidisan, ad d-nebder gar-asen; Tiddukkla tadelsant Tiɣilt n taddart n Lemṣella akked teseqqamut n taddart-agi, Asqamu aɣerfan aɣiwan (APC) n Yilula Umalu, Aseqqamu aɣerfan n Lwilaya n Tizi Uzzu, s tallelt n tenmehla n yidles n Tizi Uzzu...atg.

Adaoun Ghani

0