Par DDK | 20 Aout 2018 | 751 lecture(s)

Aweqqas

Tameɣra tameqqrant n Ɛli Ideflawen d Iflis deg Ssaḥel

Azal n 1 000 d amdan i d-yusan ɣer Umezgun n tizzegzewt n Buṭeɣwa, ass n sem 10 ɣuct, akken ad ḥeḍren i ttiɛad n ccna n yicennayen Ɛli Ideflawen d Kamal Iflis. I lmend n tegnit-a, ula d kra n yicennayen ur nettwassen aṭas ɣur medden, ɛeddan-d i usayes, wwin-d ayen i asen-yefka wakud d tizlatin, am ugraw Ixulaf s i d-yegla Ɛli Ideflawen. D ilemẓiyen, d tilemẓiyen, d imeqqranen neɣ d tiwaculin, merra-nsen uɣen tameddit n wass-nni abrid n Buteɣwa, deg Ayt Ɛisa, i temlilit akked bab n tezlit tamḥaddit Ɛli Ideflawen, d yitri-nniḍen i d-yetteflalin n tezlit taqbaylit Iflis s yisem-is n unaẓur. « Neẓra yakk aṭas i yettwaḥemmel Ɛli Ideflawen sɣur Yisaḥliyen, d ilemẓi neɣ d amɣar. Ula d netta yezga iseggasen-a ineggura icennu di Ssaḥel ». I d-tenna tselwayt n tddukkla i t-id-iɛerḍen, Massa Farida Jabri. Send ad ternu ad d-temmeslay ɣef unaẓur ilemẓi Kamal Iflis. « Ula d Kamal, nenwa s tidet ad yili yid-neɣ. Tazwara nberreḥ-d kan s Ɛli Ideflawen acku yella urɛad i aɣ-d-yerra s tririt. Dɣa, akken kan i d-iwekked aḥḍar-ines, nerna isem-is ɣer tnazalt ». Ad d-nesmekti d akken ssuma tazamulant n unekcum, yella yerked di 200 n yidinaren kan. Yettusemma, ayen akk yerzan aheggi d yibeddi s sin n yinaẓuren i d-yusan, yella ɣef yiri n tddukkla timheggit Tadukkli n Ayt Ɛisa. Bnan ɣef waya yiɛeggalen-is imi, akken i aɣ-d-tenna ula d taselwayt Massa Jabri, xedmen ssuma n ukcam d tafessast bac ad fken tagnit i Wat Ssaḥel akkit, abeɛda iẓawaliyen, ad ḥeḍren i tmeɣra-a deg Uweqqas. Ula d Ɛli Ideflawen i tikkelt tamenzut ara yecnu deg ubraḥ n umezgun n Buṭeɣwa.
M. K.

0