Ad d-suddsen srabes n tfellaḥt n tɣiwant n Mɛatqa, ass n ttlata 4 deg waggur n cutember 2018, yiwen n wass n tussna deg uḥric n uzemmur d wayen i icudden yakk ɣer usafar-agi agejdan deg tdamsa n temḍiqt n Leqbayel. D leqdic ara yebdun ɣef 9h n ssbaḥ deg Uxxam n yelmeẓyen n tɣiwant. Ad sidren ass-agi n tussna imussnawen n srabes n tfellaḥt n ugerzu n Tizi-Uzzu (DSA) d imussnawen n uselmad n tfellaḥt n Sidi Aiche n ugerzu n Bgayet, aṭas n temsal i icudden ɣer lɣella n uzemmur ara yilin deg ttiɛad. Gren tiɣri srabes n tfellaḥt n tɣiwant n Mɛatqa i yifellaḥen d tddukkliwin n tɣiwant akken ad ḥedren i wass-agi n tussna. D tagnit i yefellaḥen, ad sfaydin seg tmussniwin yemgaraden yeɛnan aḥric n uzemmur, ama seg wudem n tmetti, tadmsa neɣ tussna. Uqbel yal tasemhuyt n ulqaḍ n uzemmur, ttheggin-d srabes n tfellaḥt aṭas n leqdicat deg uswir n uwelleh d uḥesses n yifellaḥen ɣef temsal yeɛnan azemmur.
Ali Zalouk