Tasebḥit n wass-nni n larebɛa yezrin, 05 cutember 2018, i d-tberreḥ tneɣlaft n usegmi aɣelnaw s beddu unṣib n useggas aɣurbiz n 2018-2019, seg uɣerbaz alemmas n Derdara, deg tɣiwant n Ɣris, deg Mɛeskeṛ. Din daɣ ay testenya amtawa n unmireg gar tenmehliwin n ussegmi, imjuḥad, tawennaḍt d tdawsa. Am wakken i teḥder deg tesfugla n uɛiwed n uftaḥ n uɣerbaz n Debbab Larbi, deg tɣiwant n Ḥasin, i yettwaṣeggmen bedemma n tuɣalin-agi. Seg temdint n Mɛesker, i d-tella temsirt tamezwarut, i d-yewwin awal ɣef usentel-agi : « Tameddurt d tdukli deg talwit: d aksab yerna d amenzay asegman d uɣerman ». Deg taggara n terzi-ines ɣer lwilaya-a, tga timlilit akked tɣemsa, anda i d-tenna: “ Aṭas n ugerrez i d-yellan deg tuɣalin-agi tamaynut, ma nesserwes-it tid n yiseggasen yezrin, yerna tella-d deg tegnatin igerrzen ». Temmeslay-d daɣen Massa Benghabrit ɣef tezmilin n yinelmaden ara yersen sya d tasawent deg tɣerɣert taliktṛunant n Uɣlif n usegmi, anect-agi i wakken ad yefru wugur udɣal n tezmilin n yinelmaden sɣur yiselmaden-nsen. Ma deg wayen yerzan aselmed n tmaziɣt, tenna-d Nouria Benghabrit belli, amḍan n twilayin ideg la tettwaselmad iɛedda i 40, tenna-d, diɣ, aɣlif-is la yekkat i wakken sya ɣer sdat, ad-iḥaz lwilayat-nni-nniḍen i d-yeqqimen. Dɣa deg lwilaya-agi n Mɛesker, yebda uselmed n tutlayt-a tamaziɣt deg 5 n yiɣerbazen taswiɛt-a. ɣer taggara ad nesmekti, belli lwilaya-agi n Mɛesker, azal n 228 000 n yinelmaden i yuɣalen ɣer leqraya deg 640 n yiɣerbazen i tesɛa lwilaya, gar iɣerbazen imenza d yilemmasen akked tesnawiyin.
Ugar n 9 n yimelyan n yinelmaden i yuɣalen s aɣerbaz
Tella-d tuɣalin s aɣerbaz deg tmurt n Lezzayer, ass-nni n larebɛa yezrin, i lmend n useggas aɣurbiz 2018-2019, anda i yuɣalen wazal n 9 269 892 n yinelmaden ɣer tneɣriyin-sen deg tmurt n Lezzayer merra. Ideg ara naf, 5,8% seg yinelmaden-a seg uswir n uheggi, 48,8% seg uswir amenzu, 31,7% seg uswir alemmas akked 13,7% seg uswir asnawan. Ugar 9 n yimelyan n yinelmaden-agi, yettwaferqen ɣef 27 351 n yiɣerbazen yellan deg tmurt, gar yiɣerbazen imenza d yilemmasen akked tesnawiyin, gar-asen 387 n yiɣerbazen imaynuten. Azal n 749.232 n yissegrar (encadreurs) ara d-yelhun yis-sen gar-asen 89,9% d iselmaden, ma d 10,1% d imahalen ideblanen. Tenna-d tneɣlaft n usegmi aɣelnaw, Nouria Benghabrit, belli aseggas-a aɣurbiz amaynut 2018-2019 d win n « Ussileɣ s ddemma » yerna d win yesɛan iswi akken ad yaweḍ ɣer tɣara deg usegmi. I lmend n waya, aɣlif n usegmi iswi-ines d asali n uswir n yinelmaden, ladɣa wid n uswir amenzu, imi d netta i d aswir n usadur (base). Ad nesmekti kan belli, ɣef leḥsab n uɣlif n usegmi, gar 2000 d 2018, yerna umḍan n yinelmaden s 1,2 d amelyun s lqidar 6,8%.
Souhila Yamani