Ddurt-agi yezrin, tamehla n yidles n twilayt n Tizi-Wezzu tsuddes-d yiwet n temlilit deg uxxam n yidles n Lmulud At Mεemmar anda terra tajmilt ɣef teγzi n sin n wussan seg 26 ar 27 deg waggur ideg i nella i Ccix Aεrab Bu Yezgaren, yiwen n ujgu n ccna n teqbaylit. Ass amenzu, yebda leqdic s yiwen n wahil d amerkanti, anda tella temzikent γef demma n Ccix Bu Yezgaren, syen tameddit n wass yella-d usarag sγur mass Abdenour Abdeslam,deg tzeqqa tameẓyant n uxxam n yidles, anda i d-yewwi awal γef tudert n Ccix Aεrab d umecwar-is deg tẓuri. Ma yella d ass n 27 di tuber, tella-d yiwet n tmeγra meqren anda i tuγal tejmilt akken iwata i unaẓur. Ccix Aεrab Bu Yezgaren, d yiwet n tgejdit gar tgejda n ccna n teqbaylit, ilul ass n 27 maggu 1917 di temnaḍt n Lǧemεa Saḥarij, taγiwant n Meqlaε (Tizi-Wezzu). Yesεedda temẓi-s deg lḥif am netta am tezyiwin-is. D win I iḥemlen seg zik ccna n teqbaylit, taẓuri tezdeγ idammen-is. Aṭas n wuguren i d-yemmuger s zdat-s acku tallit-nni tudert n yimesdurar tuεar aṭas. ɣas akken qessiḥet fell-as tegnit, yemmuger-itt s tebγest, yettdeggir deg wussan-is almi i d-yewweḍ useggas n 1942, Ccix Aεrab Bu Yezgaren iruḥ γer Lezzayer tamanaγt. Dγa din, yemlal d yiwen n unaẓur n ccna n ṣenf Caεbi El Hadj M’hamed El Anka, I t-yewwin ɣer terbaεt-is. Ccix Bu Yezgaren yewweḍ γer yiswi-s, ldint -as-d tewwura n tẓuri s teγzi s tehri. Aseggas n 1946 yunag γer tmurt n Fransa, dγa din tettunefk-as tegnit ad yemlil d waṭas n yinaẓuren n ccna n teqbaylit am Ccix El Ḥesnawi, Sliman Σazem, Bahya Faraḥ, Faḍma Zohra d wiyaḍ-nniḍen.
Tizlit-is tamenzut i yessekles” Annef-as- annef-as», deg useggas n 1950. Yeḥka-d deg-s tudert qessiḥen n yiγriben, wid-ak yeğğan tamurt nsen, ruḥen ttnadin lqut. Yerna daɣ yessekles tizlatin nniḍen yecban “ Am-yimezran, Akka yidus, Yejraḥ wul, A yemma ffek-iyi rrekba, A yimγaren n Cerfa, Cegεet-as ad d-yass, A yul-iw yefna-k ssber,atg”. Ccix Aεrab Bu Yezgaren, ur yecni-ara γef tsertit, cna-is γef lḥif, yef yir tudert, lγerba, iγeblan, atg. Γas akken mačči aṭas n tezlatin i yesεa, Ccix Aεrab Bu Yezgaren ijerred isem-is deg lluḥ n tẓuri, tin zeddigen, γef waya ad d-naf aṭas n yicennayen n teqbaylit i yulsen i tezlatin-is.
Ccix Aεrab Bu Yezgaren yewweḍ leɛfu n Rebbi di tefsut ass n 02 deg yebrir 1988, yemmut d aγrib γef tmurt-is, yettwemḍel di tmeqbert n Massy di lpari, tamanaγt n tmurt n Fransa.
Islam Bessaci