Sel azekka 16 deg agur n wunbir ara d-yili uskan n leqdicat i yemmugen deg agur n yulyu iεeddan deg wahil n umbadel adelsan ger tmurt n Leqbayel d La Haute Normandie i d-yellan deg temdint n Bgayet s lmendad n teẓṛigin Tira d uxxam n umezgun Abdelmalek Bouguermouh d tdukla tadelsant Tafsut-Normandie. Ahil-a adelsan iɣef d-nemmeslay yakan ttekkan deg-s waṭas n yinaẓuṛen n temnaḍt n Leqbayel gar-asen Djamel Bouali(amsuneɣ) d yinaẓuṛen-nniḍen n teklut n uɣṛbaz n tẓuṛiyin yehuskin n Yiεeẓẓugen ɣer yidis n yinaẓuṛen i d-yusan seg temnaḍt n La Haute Normandie n tmurt n Fransa seg-sen mass Patrice LEMARCHAND n umazday n usuneɣ HSH d yinaẓuṛen-nniḍen i iqeddcen deg umezgun akked ssinima. Γef akken i aɣ-d-txebbeṛ tdukla Tafsut-Normandie, i wass n 16 deg agur n wunbir, ɣef setta(18h) n tmeddit, ad yili uskan n yisura i xedmen deg unebdu iεeddan deg Bgayet yinaẓuṛen Alain Coci d Annie Coci ɣef ttṣawer d wunuɣen i yemmugen s lemεawna ger yinaẓuṛen Iqbayliyen d Yinuṛmundiyen. Isura-ya yettḥerriken(films d’animation) ad yili uskan-nsen deg uxxam n Usqamu Amnaḍan (Conseil Régional ) n La Haute Normandie, i zyada n yisallen, tzemrem ad tarum ɣer tansa-ya: [email protected]
Mokrane Chikhi