Tanmehla n yedles n temnaḍt n Tizi-Wezzu s lemεawna n tdukkliwin tidelsanin, am tiddukla n Igerbucen, Adrar Nat Gdiεa, Ixrban akk d Ḥnifa, sudsen-d yiwen n leqdec s wazal-is s teγzi n 03 n wussan deg assn 12 almi d ass n 14 numember 2011 deg wexxam n yedles n Lmulud At Mεemmar, d tajmilt i unaẓur Muḥemmed Igerbucen i lmend n umuli n wass n tlalit-is. Ahil n leqdic d amarkanti, yebda ass n 12 numember γef 10 n ssbeḥ s temzikent, syen d asarag n mass Dr. Ounoughène i d yemeslayen γef tudert d umecwar n Muḥemmed Igerbucen di tẓuri, syen amsarag yexdem aznaz s ibudan i wedlis-is « L’influence de la musique sur le comportement humain ». Tamedit n wass d tarbeεt n uγerbaz n uẓawan aγelnaw n Lzzayer tamanaγt akk d tarbeεt Afzim i d-yefkan kra n cnawi. Ass wis ssin d mass Racid Moxṭari i d yefkan yiwen usarag anda i d-yemeslay γef tudert d leqdic unaẓur-agi. Ma yella d ass-a d tagara n tejmilt, anda tella yiwet n tmeγra meqqren akk dtikci n warazen i wid i d-yufraren deg temzizelt.
Anwa i d Igarbucen?
Muḥemmed Igarbucen d taεwint n tẓuri, drus n medden i d-yettmeslayen fell-as di tmurt n Lzzayer. D anaẓur ameqqran yettwasen aṭas di tmura n lbarani walla di tmurt-is. Muḥemmed Igerbucen d aqbayli, ilul deg Temgut, taddart n At Wuccen, di tγiwant n Uzeffun aseggas n 11907. Muḥemmed wwin-t imawlan-is γer Lzzayer tamanaγt ass-mi yella d ilemẓi, dγa dinna i yemlal d yiwen n Weglizi isem-is L.Roth, d yiwen unesbaγur ameqqran. Ass mi yewweḍ 12 n yiseggasen di leεmer-is, yelmed aẓawan (Lmuziga), dγa imawlan-is ğğan-t acku mmi-tsen yezmer i yiman-is, tteklen fell-as aṭas, yeqqim γer Weglizi-nni ddeqs, syen yuγal γer uγarbaz n uẓawan (Lmuziga). Ass amenzu yelmed γur aselmad Living. Yuγal irruḥ γer tmurt n Lutric anda ikemmel ulmud-is n uẓawan. Aseggasn 1923, Muḥemed Igerbucen yesεa 16 n yiseggasen di leεmer-is, yura deg yiwet n temlilit n uẓawan (Lmuziga). Ixdem-d yiwet n lmuziga i d as-d-yesmuzegten. Igerbucen yewwi-d yiwen n wudem amaynut i uẓawan (Lmuziga) i waṭas n yisura am « La Fontaisie Algérienne », « Découverte du Sahara », « L’appel du sud »..atg d waṭas niḍen. Ihi Muḥemmed Igerbucen d tala ideg ara yagment tsutiwin i d-iteddun.
Islam Bessaci