Nuja ideflawen(Schneewittchen/Blache-Neige) d yiwet ger tmucuha n watmaten Grimm d-yesmuḥyet Sεid At Mεemmer si tlalmanit. Ukkuẓ(4) gar-asent tmucuha-yagi, asefru yakkd tezlit i warrac, la ten-tkelles tnaẓurt Tatie Tamcumt, a d-yeffeγ usidi-nsen(t) di taggara unebdu-yagi n 2011.
Dγa yenna-yasen:
« Fket-iyi-tt ihi ttxilwet d tunṭict! Dayen tura, ẓriγ ur zemmreγ ara ad ddreγ war ma ttwaliγ Nuja ideflawen yerna ad awen fkeγ awal: Ad tt-ḥemmle&gamma,; ad tt-ttqadareγ am wakken d tameṭṭut-iw ».
Segmi d asen-yemmslay s iḥulfan n tayri, iγaḍ Iymuyuden, dγa fkan-as nnεac-nni ideg teẓẓel Nuja ideflawen.
Yessuter deg ixeddamen-is, refden-t γef tuyat-nsen. Yemḍerkal uḍar n yiwen deg-sen, yuccag-as deg yiwen wexjiḍ ur t-iwala ara, mi akken d-ṣubben di tkessart, ssenquqlen Nuja akka d wakka di nnεac, din din yeffeγ-d si temgert-is rraj-nni tečča si tettefaḥt-nni tedrem, yufeg am uγebbar deg igenni,
teldid allen-is terna lγemm-nni n zzğağ d as-yuγalen i nnεac.
Tessufeγ-d aqerru-s, tenna-yasen:
« Anida lliγ akka? ».
Yerra-yas ugedun-nni s unecreḥ n wul:
« Aql-akem γur-i, γur-i ay telliḍ! ».
Yessawel-as-d akk tadyant d as-yeḍran i nettat yerna yenna-yas:
« Ḥemmleγ-kem ugar n kra yellan di ddunit; yya-d ad ttedduḍ yid-i γer lberğ n baba, ad tuγaleḍ d tameṭṭut-iw. »
Daγnettat telha yid-s, tuγ-as awal, tedda. Ass-nni kan yeffeγ umenduh, slan akk medden, ad tettwaderrez tmeγra ur ssinen ara medden ar assen.
Tameṭṭut-nni n baba-s tettwaεreḍ ula d nettat γer tmeγra.
ihi tcebbeḥ akk iman-is akken iwata tmeṭṭut, terna telsa icettiḍen yettekksen lxiq i wul amuḍin, tbedd zdat lemri-s, testeqsa-t:
“Ini-d ini-d a lemri
Deg idurar, illel neγ di tniri
Di tγerγert neγ deg igenni
Tella tmeṭṭut, aggur neγ itri
I d iyi-yugaren di ccbaḥa?”
Lemri yenna-yas-d:
„A tageldit n tidet d wulawen
Γur-m ad iyi-tγileḍ riγ ad am-ssaliγ asawen
Si ccbaḥa-m taḥuskant ifadden n tilawin akk kkawen
Maca, tif-ikem aṭas aṭas teslit a ddin ibawen“
Tameṭṭut tekfa fell-as ddunit, udem-is yuγal d awra&gamma,; teṭṭef-itt tergigit si tugdi, tewwet γef leεqel-is, ur tufi ara.
Ur teẓri d acu ara texdem, tetteḥdiqir kan, tezza temcumt.
Ccaw ur tebγi ara ad truḥ γer tmeγra, maca, tismin-nni tt-yerran ur tebγi ara ad truḥ, ur d as-ğğint ara daγen ad teqqim, war ma teẓra d acu-tt d wamek tga tmeṭṭut-agi tt-yifen di ccbaḥa.
Akken tewweḍ, tufan yendeh umenduh:
ccḍeḥ d rrḍeḥ. Tekcem kan, twala Nuja ideflawen terna teεqel-itt. Imiren timendeffirt ur telli, acku walan-tt-id akk medden, tekkes yakan daγen tarkasin d-telsa, terra deg wadeg-nsent tizeggaγin n ccḍeḥ.
Ihi ters-as i ccḍeḥ ula d nettat, tezzedway, tezzedway, almi teγli d tinnegnit, tewweḍ sanda ara naweḍ, nγan-t-tt tismin.