Taggara-a, ur yezmir umdan ad yessirem dakken yekfa fell-as lḥif n leɣla n temɛict, ad d-yerr tinexsas, yezmer ad yidir s tjernant-is, ad d-tezzi fell-as waggur ! yal tikkelt, d acu ara d-yemmager d aɣbel. Deg wussan-a ideg tbeddel tegnawt acemma, tuɣ tmes di kra n yisafaren. Talubyant-nni yellan tettnuz ḥala s 40 n yidinaren tessemɣi-d afriwen tuɣal ɣer 150 n yidinaren. Ṭumaṭic yellan kan s 30 n yidinaren tuli ɣer 80, yerna mebla afran. Ma d ifelfel, teɣzi ur yeǧǧi ara, lbenna ur tt-yeksib ara yettnuz s 100 n yidinaren, mi yella yakan 40. Ma d igumma, ur zmiren taggara-a ad ilin si nṣib n yimdanen yettidiren s tjarnant. Amek ihi, lmandarin tettnuz s 120 n yidinaren, ma d leṣnaf nniḍen ɣas ur tezzi ara tiṭ ɣur-sen !
Mi akken i d-nezzi di ssuq n temdint, nwala dakken tuget n yimdanen rran lewhi n widak yesnuzuyen adeffaḥ-nni yettwaxeznen di tasmuḍi, imi ala netta i yettnuzun gar 60 d 80 n yidinaren, meqqar amdan ad yessefreḥ at uxxam s usafar-a, imi ur yessaweḍ ara ɣer wayen nniḍen.
S. M