Timiqwa n waman, ticki qlilit, ticki d aɣurar, ssiɛzizen-tent medden. Di ssḥari n wawal, di ssḥari n usefru yebnan s lqis, maci ɛeddi kan ad tiliḍ d tiqit n waman, wa tettunefk-as, ileqqem-itt, wa yeǧǧa-tt kan akken , amer ahat ad yelhu d aḥeccad i ddwa!! “ssefraɣ ad ssefruɣ d ay-agi i d-yegran tura, wigad-agi i wumi d-ḥekkuɣ ahat ad aɣ-fehmen kra”. Amsefraw yettidir s usefru, asefru yettidir ma slan-as medden, ma refden-t deg yiles, ma uran-t di lkaɣeḍ. Asefru yettidir imi ara yessemlil timiqwa n waman, ad semden cwiṭ n wayen yelhan i teqbaylit. D tidet aɣaraf yekka-d nnig wayeḍ, yal wa d atwal i yetwel, yal wa d amek i yessefray, maɛna ur yettili ḥed d amedyaz alma yufrar wamek isenni awalen, ur yelli am netta am medden. Ma tefkiḍ-as tagnit ad yidir s imeslayen-is am zun tessadreḍ tutlayt, am zun tessadreḍ asefru, theggaḍ-as agni n liser akken ad d-yessetbaɛ atma-s. Maɛna ma yella tḥuddeḍ-as talast, terriḍ-t di ṭṭerf am win yukren aɛessas, am zun tgezmeḍ isegmi aleqqaq i d-yettaken imɣi n usirem i tmedyazt taqbaylit. Tifaskiwin n tmedyazt llant ma llan imedyazen, ma yettali weswir-nnsen si temlilit ɣer tayeḍ, ma brarḥent-asen tewwura, ma leqqmen asefru s tudert i yimru.. Fiḥel asudem n tmiqwa anda akken ur ttilint d amur, fiḥel asfillet i uɣurar skud iban usigna s-tekkat, asferu n wass-a maci d win n yiḍelli, timlilit n wass-a maci am tin n yiḍelli, win yuklalen leqder ur yezmir ḥed ad as-t-ikkes… Ur snuɣnuyet ara imecṭuḥen, mulac ad nnuɣnint lmalayekkat n usefru, ad aɣ-tɣanfi tudert, ma ur yelli umedyaz!
Zira