Telliḍ mi d- yewweḍ ucengu s amnar. Tedreḍ tignatin n tmara . Tecfiḍ amek si lxelɛa tennebren tɛebbuḍt-im igan lmendad i wurrif. Ul-im, yemḥebbaken ɣef tecriḥt n tecriḥt-im ,yennuɣna. Iḥulfa s wussan n ddiq, yeẓra tewweḍ-d nnuba n yiseflan. Igenni yesburren asigna n lɣiḍ yewwi-d igefran n lmeḥna. Ma d kem, s ṭit ur newwi tazmert, tḍefreḍ mmi-m asmi akken i iẓemmeḍ arakas . Teddiḍ d lexyal-is armi yejla akkin i udrar. Temjadaleḍ d yixem-im, yergagin i zhir n lfetna, tasa-m turew-d asefru :
Xas tesliḍ i cna- inu….
Terriḍ iman-ik zun ur tesliḍ
Xas tesliḍ i cna –inu….
Zun ur lliɣ iyi -terriḍ
I lexyal-iw ….
Tezziḍ-d aεrur
Ɣef tiɣri-w….
Tesbeddeḍ-d ṣṣuṛ
Mderkaleɣ ɣef taεzegt- inek
Cḍeɣ ɣef tidderɣelt- inek
Ɛeddaɣ zdat-ak….
Nek εeqleɣ-k d keččini
Kečč, wiss ma teẓriḍ anta i d nekkini?
Tecfiḍ i wussan n lḥif, truḍ akked tyemmatin yettwaqden deg tasiwin-nsent. lehlak isaɣ am yir adfel ɣef tmurt, yewwi cbiha n lekfen. Negren yirgazen, tajmaɛit tectaq win ara d- yerzun fell-as. Yeqqim ubrid n tala d amuḥzin ur llin yilmeẓyen ara d- yezwiren i tullas. . Tilmeẓyin, yesburren amendil n layas, runt ɣef sseɛd-nsent ukḥis. Faqent ur d- yeqqim win ara d- yecnun tahuski-nsent. Tala, ikbel-itt lweḥc akked tsusmi, ma d tullas, ur d- ufint tacrurt i tmenna. Allen-im yeččuren d anuɣni, udem-im iwumi tekkseḍ timmi, cerwen leḥwari. Tufiḍ takka n ddel tesbur leqramed. Temjadaleḍ akked yixef-im, allaɣ tettenjaɛ tisselbi yewwi-d asefru :
S tmes-iw rɣiɣ….
Yeggra-d iɣed –inu
Deg-i tettwaliḍ….
Ur d- tecqiḍ d liḥala- inu
Iɣed -iw …
Yeddem-it waḍu
Yewwi-t i tignaw akkin
Yeṣṣaweḍ-itin ɣer ɣur-k
Isers-it-in ɣer yiḍarren-ik
Tukleḍ-iyi!
Assen tiɣri-w d tasusamt…
Kečč tgezmeḍ taswaεt
Neṭḍeɣ ɣer ugerz-ik
Telḥiḍ….
Yid-k yedda ṛruḥ iw
Tbeddeḍ…
Yid-k beddent nhat-iw!
Tessadreḍ i wallen -ik
Grurceɣ-d zdat-sent
Nekk εeqleɣ-k d keččini
Kečč, wiss ma teẓrid anta i d nekkini
Tecfiḍ mi yenhudd usqif n ṭmana. Tecfiḍ i lexdeɛ n watmaten. Tecfiḍ mi tqacem tdukkli. Yir accaren gezren di tujma n tmurt-im . Iṣeggaden n tafat summen itran deg yigenni-m. smundlen tiflin n lhu, sderɣlen lefnar n tneflit. lqum abeɛli yekkes fad s yejdi yerɣan. Atlaf yuɣal d lewhi, akerfa yeččur ikufan, ma l ḥeb yeddem-it waḍu . Ixef yegren di ttewḥid yewwi-kem deg ubrid n yiman-im, tedliḍ ɣef tezrugin n lɛemṛ-im, lḥif-im yezwar ɣer yiles, yewwi-d asefru :
Yewwet-d ugeffur
Yenǧer-d tiregwa
Rniɣ asent imeṭṭi-w
Neqqel d lḥamla
Nuli d asawen
Nunag ɣer lebεid….
Tamurt tefka-yi i tayeḍ!
Dliɣ ɣef wayen yellan
Ufiɣ aṭas ur nelli !
Ḍalleɣ ɣef lesrar n yidurar
Walaɣ iḍarren i ten irekḍen
Telliḍ gar-asen
Tukleḍ adif n ddunit
Suɣeɣ… A bbuh i txedmem!
Tiɣri-w tekka d nnig wen
Yiwen ur d- isli
Tcerreg tsusmi…
I dqiqa frawsen
I tayeḍ ttun
Ɛeddaɣ d nnig-k
Nekk ẓriɣ d keččini
Kečč wiss ma tezriḍ anti d nekkini
Tecfiḍ mi tettwarqed lmisa. Win i d-iferqen rrezg , yuker seg yimi-m iḥbuben yellan d ayla-m. yekkes-am alqim. Yesmenyaf aydi amṣuḍ. Seg wassen, iqjan qlen d iqerra. Di taddart , ṭṭamen yuɣal d allalen gar yifassen n lbaṭel. Tnuḍaḍ ansi i d-iṣuḍ waḍu n timurṣad i d- yewwin isyaxen ɣer uɛerqub n tnaṣlit. Deg yirebbi-m thuẓzeḍ ccna-nni yesduqqusen, meɛna yeḥnunef lebɣi ɣef ugni n ustehzi armi yuɣal wawal, d aɣeddu asalaw yerɣan ddaw n yiɣuraren n yir tamusni. Yebbehba lxaṭer- im, yennuɣ ṣṣwab d tibuhelt,. Taɣzint-im yugin leɣṛur, tecceḍ ɣer yifri n lawan , din, tufa awal yettmeǧǧid, yettru. Teddmeḍ -t-id , terriḍ-as leɛnaya-m, din yezdi d asefu :
Ḥulfaɣ yennerna uṣemmiḍ
Uɣaleɣ d agris
Ssiɣ ɣef wul –ik
Sebkeɣ idammen -ik
Kerfeɣ allaɣ ik
Rriɣ tawla deg wallen ik…
Ḥulfaɣ i lxuf s i iḥebbek wul –ik
Ḥulfaɣ i lḥir yessazlen iḍarren-ik
Tbedded ɣef umnar n tisselbi
Tennuɣeḍ d ṣṣwab n tmusni
Tewser tettsummu di temẓi k
Lmut tettgabar ixef-ik….
Selfeɣ i yidmaren -ik
Jebdeɣ-d lebraq n usirem-ik
Ɣliɣ-n gar yifassen- ik….
Nekk, εeqleɣ-k d keččini
Kečč, wiss ma teẓriḍ anti i d nekkini ?
Tecfiḍ mi i am-medlen allen, mi i am-adlen udem-im, mi rran aɛjar ɣef tmuɣli-m. Ugaden irij n tegrawla ireqqen deg yiẓri-m. Tecfiḍ mi i am-ɛebban ssiyat, mi ssemẓin azal-im, mi nɣan deg yixef-im tudert, mi ttun tamsunt yettidir
deg lejwareḥ-im. Tuzzuft yeddan di later-im , tuɣal-asen d times yesserɣayen talsa deg yiman-nsen yellan d amaɛlal. Tecfiḍ asmi, ɣef ufeggag n tmuḥaqranit, zḍen leqyud ara ikeblen lebɣi-m, awidukan ad tiliḍ s ddaw n yir iḍarren yuklen armi d asendef telqeq n lɛamr-im. Tecfiḍ i txidas ṛebban di tili akken awal-im ad yexmet si ddaw n yiles-im, akken ad yehluli ljehd n umyag-im di txennaqt n yimeṭṭawen-im. Tasga n ṭṭlam d win i d amḍiq i d am- budden. Di lbaḍna, ṛṛuḥ-im inawel ccna uqriḥ, yesɛezgen ula d tasusmi :
D lwehymat i yuɣal wudem-ik
Xas brarḥent tewwura
Ṣṣura-k tegguma ad tɛeddi
D acu-t yakk waya ?
Ixef -ik yeεdez i unadi !
Tsendeḍ ɣef uεekkaz n layas
Tkecmeḍ deg yir ameqyas
Truḍ…
Seg wallen-ik ɣliɣ-d d imeṭṭawen
Zrargeɣ ɣef wudem-ik
Mecḥeɣ icenfiren-ik
Beddeɣ ɣef yiles- ik
Serseɣ deg-s imeslayen…
Nekk dayen tebɣiḍ
Nekk d ssebba n tudert-ik
Nekk d tafsut n ddunit -ik
Nek d idelli-k
Nekk d ass a inek
Neɣ ahat …
D taqṣit izedɣen di lmux ik
Yellan ɣer yidis n tasa-k
Neɣ ahat…
Yess-i i iḥebbek wul-ik
Ih…
Nekk ay d tin
Tinna akken yekkukra ad yebder yimi k
Nekk ẓriɣ anwa i d kečcini
Kečč wis ma ad tt-tɛeqleḍ …
Anta i d nekkini
Ait Slimane Hamid